Konstıtýtsııa jobasynda ótpeli tetikter naqty jazylýy kerek – Imasheva
ASTANA. KAZINFORM – Konstıtýtsııa jobasynda qorytyndy jáne ótpeli erejeler barynsha naqty ári jan-jaqty aıqyndalýy tıis. Bul týraly Konstıtýtsııalyq reformalar jónindegi komıssııanyń XI otyrysynda Májilis depýtaty Snejanna Imasheva málimdedi.
Onyń aıtýynsha, eń aldymen Konstıtýtsııanyń kúshine ený tártibi men merzimderi naqty belgilenýi qajet. Atap aıtqanda, negizgi zańnyń erejeleri respýblıkalyq referendým nátıjeleriniń resmı jarııalanǵan kúninen bastap pa, álde ózge naqty belgilengen kúnnen bastap qoldanysqa enetini jobada tikeleı kórsetilýi tıis.
Sondaı-aq depýtat ótpeli kezeńde qoldanystaǵy memlekettik bılik organdarynyń mártebesin retteýdiń mańyzdylyǵyna toqtaldy. Onyń ishinde qazirgi shaqyrylymdaǵy parlamenttiń ókilettikterin júzege asyrý merzimderi, saılaýlardy ótkizý ýaqyty men tártibi naqty aıqyndalýy qajet.
– Bul máselelerdi zań shyǵarý qyzmetiniń úzdiksizdigin qamtamasyz etý jáne Konstıtýtsııada kózdelgen ınstıtýtsıonaldyq jańashyldyqtardy iske asyrý qajettiligin eskere otyryp qarastyrǵan jón, – dedi Snejanna Imasheva.
Sonymen qatar ótpeli erejelerde Konstıtýtsııalyq sottyń, Ortalyq saılaý komıssııasynyń jáne Joǵary aýdıtorlyq palatanyń jańa quramyn qalyptastyrý tetikterin, sondaı-aq negizgi memlekettik organdardyń laýazymdy tulǵalaryn taǵaıyndaý tártibin belgileý qajet ekeni atap ótildi.
– Qoldanystaǵy zańdar men ózge de normatıvtik-quqyqtyq aktilerdiń Konstıtýtsııa kúshine engennen keıingi mártebesi de naqty reglamenttelýi tıis. Atap aıtqanda, olardyń kúshin saqtaý máselesi jáne jańa konstıtýtsııalyq normalarǵa sáıkestendirý merzimderi jobada tikeleı kórsetilýi qajet, – dedi ol.
Snejanna Imasheva bul normalar quqyqtyq aıqyndyqty, memlekettik ınstıtýttardyń turaqty jumysyn jáne ótpeli kezeńdegi ókilettikterdiń naqty shekarasyn qamtamasyz etetinin atap ótti.
Onyń pikirinshe, atalǵan bólim tolyq pysyqtalǵannan keıin, Konstıtýtsııa jobasy referendýmǵa engizýge daıyn bolady.
Buǵan deıin Konstıtýtsııa jobasyna sottan tys turǵyn úıden aıyrýǵa, shyǵarýǵa tyıym salatyn norma engiziletinin jazǵanbyz.