Konstıtýtsııa jobasyna sottan tys turǵyn úıden aıyrýǵa, shyǵarýǵa tyıym salatyn norma engiziledi
ASTANA. KAZINFORM – Konstıtýtsııa jobasyna sottan tys turǵyn úıden aıyrýǵa ǵana emes, odan shyǵarýǵa da tyıym salatyn norma engiziledi. Bul týraly Konstıtýtsııalyq reformalar jónindegi komıssııanyń HІ otyrysynda Adam quqyqtary jónindegi ýákil Artýr Lastaev aıtty.
- Búgin Memleket basshysy Qasym-Jomart Toqaev Úkimettiń keńeıtilgen otyrysynda qazirgi Qazaqstan úshin óte mańyzdy taqyryp – adamnyń turǵyn úıge quqyqtaryn qorǵaý kepildigin qozǵady. Turǵyn úı quqyqtyq múlik sanalady. Ol adam quqyqtarynyń jalpyǵa birdeı deklaratsııasynda jáne ekonomıkalyq, áleýmettik jáne mádenı quqyqtar týraly paktide bekitilgen. Bireýler bul tek menshik quqyǵy dep oılaýy múmkin. Biraq is júzinde bul quqyq kóp qyrly. Baspana basyńdaǵy shatyr ǵana emes. Ol qaýipsiz, qoljetimdi jáne ómir súrýge jaramdy bolýy tıis, - dedi Adam quqyqtary jónindegi ýákil.
Onyń aıtýynsha, adam úıinen bireýler bostan bosqa shyǵaryp jibermeıtindigine senimdi bolýy tıis. Bireýdi qalaǵan ýaqytynda úıinen shyǵaryp jiberýge bolmaıdy.
- Taıaýda mınýs 25, 30 gradýs aıaz boldy. Mundaı jaǵdaıda qalaı úıinen shyǵaryp jiberýge bolady? Al ol onyń jalǵyz baspanasy bolsa she? Otbasynyń kishkentaı balalary bolsa she? Iá, keıde úıden shyǵarýshylardy qorǵaý úshin mundaı qadamǵa barýǵa bolady. Máselen, ómiri men densaýlyǵyna qaýip tóndiretin lokatsııa jaıynda sóz bolǵanda. Óıtkeni turǵyn úı quqyǵy qaýipti jaǵdaıda ólip ketý degendi bildirmeıdi. Degenmen lıgıtımdi negizder bolǵan jaǵdaıdyń ózinde barlyq protsedýra, onyń ishinde sotta ózin-ózi qorǵaý quqyǵy qamtamasyz etilýi tıis, - dedi Artýr Lastaev.
Sondyqtan ol Konstıtýtsııa jobasyna «sottyń sheshiminsiz turǵyn úıden aıyrý turmaq odan shyǵarýǵa da bolmaıdy» degen normany engizý kerek dep sanaıdy.
- Konstıtýtsııada turǵyn úıge adam quqyqtaryn qorǵaý kepildikteri týraly normany bekitý elimizdiń áleýmettik jáne quqyq qorǵaý sıpatyn, azamattardyń quqyqtary men bostandyqtarynyń múltiksiz saqtalýyn bekitedi. Bul biz úshin óte mańyzdy. Óıtkeni memleket rámizder úshin emes, qoǵamdaǵy árbir adam úshin qurylǵan. Adamǵa baǵdarlaný bıliktiń árbir sheshimi men áreketinde kórinýi kerek. Usynysty qoldaýdy jáne negizgi zańda sottan tys turǵyn úıden aıyrýǵa ǵana emes, odan shyǵarýǵa da tyıym salýdy qarastyrýdy suraımyn, - dedi Adam quqyqtary jónindegi ýákil.
Aıta keteıik, búgin Bul týraly Úkimettiń keńeıtilgen otyrysynda Memleket basshysy Qasym-Jomart Toqaev Konstıtýtsııa jobasyna sot sheshiminsiz «turǵyn úıden májbúrlep shyǵarýǵa» da jol berilmeıdi dep tolyqtyrýdy usynǵan edi.
