Konstıtýtsııa jobasyna halyq usynǵan qandaı máseleler endi – «Referendým-2026»
ASTANA. KAZINFORM – Respublika partııasynyń teń tóraǵasy, Májilis depýtaty Aıdarbek Qojanazarov aldaǵy referendýmǵa shyǵarylǵan Konstıtýtsııa jobasynda halyqtan túsken usynystar qanshalyqty eskerilgeni týraly pikir bildirdi.
– eGov, e-Ótinish sııaqty keri baılanys arnalary arqyly shynymen de 10 myńnan astam ár túrli usynys tústi. Odan basqa konstıtýtsııalyq reforma jónindegi komıssııa jumysyna qatysqan ár depýtat osyǵan deıingi halyqpen kezdesýlerde aıtylǵan usynystardy qaıta kóterýge múmkindik aldy. Maǵan da qanshama adam kelip, usynys aıtty?! Ol usynystar qalaı eskerildi degenge kelsek, eń bastysy, ózimiz burynnan beri talqylap kele jatqan bir másele boldy. Tsıfrlyq qaýipsizdik, tsıfrlyq alańda derbes derekterdi qorǵaý, azamattyń quqyǵyn offlaın ǵana emes, onlaın rejımde de qorǵaý deıtin máseleni Konstıtýtsııa deńgeıine kótere aldyq. Qanshama azamattarymyzdyń derekteri jelige tarap ketip jatyr. Ony aılakerler paıdalanyp, aqshalaryn ıelenip ketkenine kýá boldyq. Osyǵan tosqaýyl qoıyp, tótep berý úshin Konstıtýtsııaǵa osyndaı mańyzdy máseleni shyǵardyq, - dedi ol.
Komıssııa múshesi jeke menshiktegi baspanany qorǵaý quqyǵyn kúsheıtý de halyqtan túskenin aıtyp otyr.
– Sottyń sheshiminsiz odan adamdy shyǵarmaý týraly norma enip otyr. Meniń oıymsha, bul – óte mańyzdy bap. Áleýmettik jeliden baspana daýyna baılanysty túrli jaǵdaılardy kórip otyrmyz. Sondaı jaıttarǵa jol bermeý úshin Ata zańǵa norma engizdik, - dedi depýtat.
Aıta keteıik, Kazinform agenttiginiń YouTube arnasynda «Referendým-2026» atty onlaın-marafonyn tikeleı efırde kórsetip jatyr. Saǵat 12:00-de bastalǵan onlaın-marafon saǵat 18:00-ge deıin jalǵasady dep josparlanǵan.