Konstıtýtsııa jobasyn «sot sheshiminsiz turǵyn úıden májbúrlep shyǵarýǵa» da jol berilmeıdi dep tolyqtyrǵan jón — Prezıdent

ASTANA. KAZINFORM — Konstıtýtsııa jobasyn sot sheshiminsiz «turǵyn úıden májbúrlep shyǵarýǵa» da jol berilmeıdi dep tolyqtyrǵan jón. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.

— Túptep kelgende, usynylyp otyrǵan ózgeristerdiń arqaýy — bir. Bul — adamdardyń jáne azamattardyń quqyqtary men bostandyqtaryn qorǵaý. Bul — jalań sóz emes. Biz adam quqyǵynyń qorǵalýyna kepildik beretin jáne onyń naqty joldary aıqyn kórsetiletin birtutas júıe qalyptastyramyz. Mysaly, advokattardyń usynysymen Ata Zań jobasyna advokatýra týraly jeke bap qosyldy. Jańa Konstıtýtsııa jobasynda bilim berý júıesine basa mán berý arqyly memlekettiń zaıyrly sıpaty da naqtylana tústi. Al «Neke — erkek pen áıeldiń erikti jáne teńquqyly birlestigi, ıaǵnı odaǵy» degen tujyrym arqyly qoǵamdaǵy dástúrli qundylyqtardy saqtap qalý maqsaty kózdeldi, — dedi Prezıdent.

Memleket basshysy Konstıtýtsııa jobasynda tabıǵatty qorǵaý máselesine de nazar aýdarylǵanyn aıtty.

— Menińshe, bul — óte mańyzdy nárse. Túzetýlerdiń ishine taǵy bir asa qajetti normany engizý kerek. Qazirgi Konstıtýtsııada «Turǵyn úıge qol suǵýǵa bolmaıdy. Sot sheshiminsiz turǵyn úıden aıyrýǵa jol berilmeıdi» degen ereje bar. Osy erejeni «turǵyn úıden májbúrlep shyǵarýǵa» da sot sheshiminsiz jol berilmeıdi dep tolyqtyrǵan jón. Menińshe, bul — jańa Konstıtýtsııanyń sıpatyna tolyq saı keletin áleýmettik norma. Konstıtýtsııalyq komıssııa múshelerinen osy usynysty qaraýdy suraımyn. Tutastaı alǵanda, Negizgi Zań jobasynda Qazaqstannyń qarqyndy damýyna, ultymyzdyń uıysýyna qajetti irgeli qaǵıdattar men qundylyqtar tolyq qamtylǵan, — dedi Qasym-Jomart Toqaev.

Keńeıtilgen otyrys barysynda Prezıdent qoǵamnyń saıası mádenıeti jáne belsendiligi artyp kele jatqanyn aıtty.