Konstıtýtsııa jobasy: Úkimet jańa Quryltaıdyń aldynda óz ókilettigin toqtatady

ASTANA. KAZINFORM — Jalpyhalyqtyq referendýmǵa shyǵarylǵan jańa Konstıtýtsııa jobasy qabyldanǵan jaǵdaıda Úkimet jańadan saılanǵan Quryltaı aldynda óz ókilettigin doǵarady.

Atalǵan norma búgin jarııalanǵan jańa Konstıtýtsııa jobasynyń «Úkimet» bólimindegi 69-bapta jazylǵan. 

Sonymen qatar, Úkimet jáne onyń kez kelgen múshesi ózderine júktelgen fýnktsııalardy odan ári oryndaý múmkin emes dep eseptese, Qazaqstan Respýblıkasynyń Prezıdentine ornynan túsý týraly málimdeme berýge quqyly.

Munymen qosa, Quryltaı Úkimetke senimsizdik votýmyn bildirgen jaǵdaıda Úkimet Qazaqstan Respýblıkasynyń Prezıdentine ornynan túsý týraly málimdeıdi. Ornynan túsýdi qabyldaý nemese qabyldamaý týraly máseleni Qazaqstan Respýblıkasynyń Prezıdenti on kún ishinde qaraıdy.

Atap aıtqanda, Premer-Mınıstrdiń ornynan túsýin qabyldaý búkil Úkimettiń ókilettigi toqtatylǵanyn bildiredi. Úkimettiń nemese onyń múshesiniń ornynan túsýi qabyldanbaǵan jaǵdaıda Qazaqstan Respýblıkasynyń Prezıdenti oǵan mindetterin odan ári atqarýdy tapsyrady.

- Qazaqstan Respýblıkasynyń Prezıdenti óz bastamasymen Úkimettiń ókilettigin toqtatý týraly sheshim qabyldaýǵa jáne onyń kez kelgen múshesin laýazymynan bosatýǵa quqyly. Premer-Mınıstrdi laýazymynan bosatý búkil Úkimettiń ókilettigi toqtatylǵanyn bildiredi, - delingen qujat jobasynda. 

Esterińizge sala ketsek, keshe Memleket basshysy Qasym-Jomart Toqaev 2026 jylǵy 15 naýryzda respýblıkalyq referendým ótkizý týraly Jarlyqqa qol qoıdy.