Konstıtýtsııa jobasy turǵyn úıge qol suqpaýshylyq kepildikterin kúsheıtedi
ASTANA. KAZINFORM — Jalpyhalyqtyq referendýmǵa shyǵarylǵan jańa Konstıtýtsııa jobasy qabyldanǵan jaǵdaıda turǵyn úıge qol suqpaýshylyq kepildikterin kúsheıtedi.
Respýblıkalyq basylymdardy jarııalanǵan jańa Konstıtýtsııa jobasynyń 28-baby 1-tarmaǵynda «Turǵyn úıge qol suǵýǵa bolmaıdy. Sot sheshiminsiz turǵyn úıden aıyrýǵa jáne shyǵaryp jiberýge jol berilmeıdi. Turǵyn úıge basyp kirýge, ony qarap-tekserýge, tintýge zańda belgilengen jaǵdaıda jáne kózdelgen tártippen jol beriledi», — delingen.
Aıta keterligi, qazirgi qoldanystaǵy Ata zańnyń 25-baby 1-tarmaǵynda da turǵyn úıge qol suǵylmaýshylyǵy naqty jazylǵan. Biraq jańa redaktsııada ol stıldik turǵyda jatyq jazylyp, sot sheshiminsiz turǵyn úıden shyǵaryp jibermeýge de bolmaıtyndyǵy anyq kórsetilgen.
Sonymen qatar qoldanystaǵy Konstıtýtsııanyń joǵaryda atalǵan babynyń 2-tarmaǵynda zańda kórsetilgen sanattaǵy muqtaj azamattarǵa turǵyn úı zańmen belgilengen normalarǵa sáıkes memlekettik turǵyn úı qorlarynan olardyń shama-sharqy kóteretin aqyǵa beriletindigi kórsetilgen.
Al referendýmǵa shyǵarylyp otyrǵan jobada bul norma «Turǵyn úı soǵan muqtaj azamattardyń zańda kórsetilgen sanattaryna zańda belgilengen normalarǵa sáıkes beriledi» dep naqtylanǵan.
Aıta keteıik, Memleket basshysy Úkimettiń keńeıtilgen otyrysynda Qasym-Jomart Toqaev Konstıtýtsııa jobasyn sot sheshiminsiz «turǵyn úıden májbúrlep shyǵarýǵa» da jol berilmeıdi dep tolyqtyrǵan jón ekenin aıtqan edi.
