Konstıtýtsııa jobasy maquldanǵan jaǵdaıda Parlament ókilettigin qashan toqtatady
ASTANA. KAZINFORM – Jalpyhalyqtyq referendýmǵa shyǵarylǵan Konstıtýtsııa jobasynda VIII shaqyrylymdaǵy Parlament ókilettigin toqtatyn jáne Prezıdenttiń birqatar laýazym ıelerin qyzmetke taǵaıyndaıtyn merzim naqty belgilengen.
Naqtyraq aıtqanda, respýblıkalyq basylymdardy jarııalanǵan jańa Konstıtýtsııa jobasynyń 95-babynda 1995 jylǵy 30 tamyzdaǵy Qazaqstan Respýblıkasynyń Konstıtýtsııasyna sáıkes qalyptastyrylǵan Qazaqstan Respýblıkasynyń Parlamenti óz ókilettigin 2026 jylǵy 1 shildeden bastap toqtatatyny jazylǵan. Al Konstıtýtsııa kúshine engen kúnnen bastap bir aı ishinde Qazaqstan Respýblıkasynyń Prezıdenti Quryltaı saılaýyn jarııalaıdy jáne ol eki aı ishinde ótkiziledi.
Sonymen qatar birinshi shaqyrylǵan Quryltaıdyń birinshi sessııasy ashylǵan kúnnen bastap eki aı ishinde Qazaqstan Respýblıkasynyń Prezıdenti Quryltaıdyń kelisimimen Vıtse-Prezıdentti taǵaıyndaıdy. Al Konstıtýtsııalyq Sot tóraǵasy men sýdıalary birinshi shaqyrylǵan Quryltaıdyń birinshi sessııasy ashylǵan kúnnen bastap eki aı ishinde taǵaıyndalýǵa tıis.
Munan bólek, 1995 jylǵy 30 tamyzdaǵy Qazaqstan Respýblıkasynyń Konstıtýtsııasyna sáıkes taǵaıyndalǵan Konstıtýtsııalyq Sot tóraǵasy men sýdıalary Konstıtýtsııalyq Sottyń jańa quramy qalyptastyrylǵanǵa deıin óz ókilettigin saqtaıdy.
Ortalyq saılaý komıssııasynyń, Joǵary aýdıtorlyq palatanyń tóraǵalary men músheleri birinshi shaqyrylǵan Quryltaıdyń birinshi sessııasy ashylǵan kúnnen bastap eki aı ishinde taǵaıyndalatyn bolady.
1995 jylǵy 30 tamyzdaǵy Qazaqstan Respýblıkasynyń Konstıtýtsııasyna sáıkes taǵaıyndalǵan Ortalyq saılaý komıssııasynyń, Joǵary aýdıtorlyq palatanyń tóraǵalary men músheleri Ortalyq saılaý komıssııasynyń jáne Joǵary aýdıtorlyq palatanyń jańa quramy qalyptastyrylǵanǵa deıin óz ókilettigin saqtaıdy.
Joǵarǵy sot tóraǵasy, Ulttyq bank tóraǵasy, Bas prokýror, Ulttyq qaýipsizdik komıtetiniń tóraǵasy, Joǵarǵy sot keńesiniń tóraǵasy, Adam quqyqtary jónindegi ýákil Konstıtýtsııa kúshine engen kúnnen bastap eki aı ishinde taǵaıyndalmaq.
1995 jylǵy 30 tamyzdaǵy Qazaqstan Respýblıkasynyń Konstıtýtsııasyna sáıkes saılanǵan (taǵaıyndalǵan) Joǵarǵy sottyń, jergilikti jáne basqa da sottyń sýdıalary, máslıhat depýtattary, ózge de laýazymdy adamdar óz ókilettikterin Qazaqstan Respýblıkasynyń Konstıtýtsııasy men zańdarynda kózdelgen negizder boıynsha ókilettigi toqtatylǵanǵa deıin saqtaıdy.
Aıta keteıik, keshe Memleket basshysy 2026 jylǵy 15 naýryzda respýblıkalyq referendým ótkizý týraly Jarlyqqa qol qoıdy.
