Konstıtýtsııa jobasy, dıplomatııa jáne gallıı eksporty: sheteldik BAQ Qazaqstan týraly ne jazdy
ASTANA. KAZINFORM – Osy aptada sheteldik medıanyń nazarynda Qazaqstan máseleleri jıi talqylandy. Álemdik BAQ-taǵy negizgi materıaldardy Kazinform agenttiginiń sholýynda toptastyrdyq.
RBK: Qazaqstan parlamenti túzetýlerdi jańa Konstıtýtsııaǵa qadam dep baǵalap otyr
– Qazaqstanda daıyndalyp jatqan konstıtýtsııalyq ózgeristerdiń aýqymy is júzinde jańa Negizgi zań qalyptastyrýǵa alyp kelip otyr, – dep jazady RBK.
Májilis tóraǵasynyń orynbasary Danııa Espaevanyń aıtýynsha, usynylyp otyrǵan túzetýler kólemi 1995 jylǵy Konstıtýtsııaǵa jekelegen ózgerister engizý sheńberinen áldeqashan asyp ketken.
Depýtattardyń málimetinshe, ózgerister Konstıtýtsııanyń 77-den astam babyn qamtıdy. Al Konstıtýtsııalyq komıssııa jumysynyń qorytyndysy boıynsha Negizgi zań mátininiń shamamen 84 paıyzy jańartylady. Bul memlekettik bılik júıesiniń qurylymyn qaıta qaraýdy, ókilettikterdi qaıta bólýdi jáne tejemelik pen teńestirmelerdiń jańa júıesin qalyptastyrýdy kózdeıdi.
– Reforma aıasynda bir palataly parlament, Quryltaıǵa kóshý, Halyq keńesin qurý, vıtse-prezıdent laýazymyn engizý jáne parlament ókilettigin keńeıtý qarastyrylǵan. Sonymen qatar memlekettiń ýnıtarlyq sıpaty men aýmaqtyq tutastyǵy saqtalady, – dep jazady basylym.
TPS-IL: Izraıl men Qazaqstan dıplomatııalyq jáne ekonomıkalyq baılanysty nyǵaıtyp jatyr
Izraıldiń TPS-IL agenttigi Izraıldiń syrtqy ister mınıstri Gıdeon Saardyń Qazaqstanǵa jasaǵan sapary týraly habarlady. Mundaı deńgeıdegi sapar sońǵy ret 2010 jyly bolǵan. Sapardyń negizgi maqsaty saıası dıalogty nyǵaıtý jáne ekonomıkalyq yntymaqtastyqty keńeıtý boldy.
Gıdeon Saar Qazaqstannyń syrtqy ister mınıstri Ermek Kósherbaevpen kelissóz júrgizdi. Kezdesý barysynda taraptar Qazaqstannyń Avraam kelisimderine qosylý múmkindigin, vızalyq tártipti jeńildetý jáne dıplomatııalyq kadrlardy daıarlaý, sondaı-aq jarııa dıplomatııa salasyndaǵy yntymaqtastyq máselelerin talqylady. Nátıjesinde ózara túsinistik týraly memorandýmǵa qol qoıyldy.
Sapar aıasynda tarıhı jady máselesine de erekshe mán berildi. Prezıdent Qasym-Jomart Toqaev Izraıl Prezıdenti Itshak Gertsogqa joldaǵan hatynda Holokost qurbandarynyń tarıhtaǵy ornyn umytpaý qajettigin aıtty. Sonymen qatar basylym Gıdeon Saardyń Memleket basshysymen jáne Qazaqstandaǵy evreı qaýymdastyǵy ókilderimen kezdesýi josparlanǵanyn jazdy.
Kyodo: Mitsubishi Qazaqstannan gallıı ımporttaı bastaıdy
Japonııanyń Kyodo agenttigi Mitsubishi korporatsııasy 2026 jyldan bastap Qazaqstannan sırek metall – gallıı ımporttaýdy josparlap otyrǵanyn habarlady. Tıisti kelisim «Alıýmınıı Qazaqstana» AQ-men jasalǵan.
Gallıı óndirisi Pavlodar qalasyndaǵy zaýytta jolǵa qoıylady. Kásiporyn 2026 jyldyń úshinshi toqsanynda iske qosylady dep josparlanǵan. Jylyna shamamen 15 tonna ónim óndirilip, onyń barlyǵy Japonııa naryǵyna eksporttalady. Gallıı jartylaı ótkizgishter, elektr kólikteri jáne jaryqdıodty tehnologııalar óndirisinde qoldanylady.
Sonymen qatar Eurasian Resources Group kompanııasy da gallıı óndirisine ınvestıtsııa salýdy josparlap otyr. Bul Qazaqstandy álemdegi iri óndirýshilerdiń qataryna qosýy múmkin.
Nova: Qazaqstan 2026 jylǵy óńirlik ekologııalyq sammıtti qabyldaıdy
Italııalyq Nova agenttigi 2026 jylǵy óńirlik ekologııalyq sammıt Astanada 22–24 sáýir aralyǵynda ótetinin jazdy.
Agenttik forýmǵa úkimet ókilderi, halyqaralyq uıymdar, bıznes jáne ǵylymı qaýymdastyqtan shamamen 1500 delegat qatysatynyn aıtady. Sammıt BUU qoldaýymen uıymdastyrylyp, klımattyq ózgeris, sý resýrstaryn basqarý, kómirqyshqyl gazy shyǵaryndylaryn azaıtý, azyq-túlik qaýipsizdigi jáne ekologııaǵa baılanysty qarjylandyrý máselelerine arnalady.
Negizgi taqyryptardyń qatarynda Aral teńizi men Kaspıı deńgeıiniń tómendeýi de bar. Sammıt qorytyndysynda Ortalyq Azııa elderiniń birlesken deklaratsııasy qabyldanyp, 2026–2030 jyldarǵa arnalǵan óńirlik is-qımyl baǵdarlamasy bekitiledi.
TV BRICS: Úndistan Qazaqstan azamattaryna tegin vıza engizedi
TV BRICS arnasynyń habarlaýynsha, Úndistan Qazaqstan azamattary úshin 30 kúnge deıin tegin vıza berý tártibin engizedi.
Vıza týrızm, medıtsınalyq em alýǵa kelgen jáne ony birge alyp júretin tulǵalar úshin qarastyrylǵan. Qujatty onlaın nemese dıplomatııalyq ókilder arqyly rásimdeýge bolady.
Úndi tarapynyń habarlaýynsha, 2025 jyly Qazaqstanǵa shamamen 250 myń úndistandyq azamat kelgen. Eki el arasyndaǵy taýar aınalymy 1 mlrd dollar shamasynda. Qazaqstan men Úndistan ShYU, BRIKS, AÓSShK jáne «Úndistan – Ortalyq Azııa» formaty aıasynda tyǵyz seriktestik ornatqan.
ÓzA: Qazaqstanda Altyn Orda dáýiriniń jańa eskertkishteri tabyldy
ÓzA agenttigi «Saraıshyq» mýzeı-qoryǵy aýmaǵynda júrgizilgen arheologııalyq qazba jumystary barysynda Altyn Orda kezeńine jatatyn úsh qonys tabylǵanyn habarlady.
Qazba kezinde turǵyn úılerdiń qaldyqtary, tsıtadel men kerýen-saraı izderi, sondaı-aq XIV ǵasyrdyń basyna tán 250-ge jýyq jádiger anyqtalǵan. Jalpy alǵanda keshen aýmaǵynan 7 myńnan astam artefakt tabylǵan. Qazirgi ýaqytta kóne qurylystardy qalpyna keltirý jumystary da qatar júrgizilip jatyr.
Sınhýa: Almaty zoobaǵynda bir jylda 80-nen astam tól dúnıege keldi
Qytaıdyń Sınhýa agenttigi 2025 jyly Almaty zoobaǵynda 31 túrge jatatyn 87 tóldiń dúnıege kelgenin habarlady.
Zoobaq bızon men tamandýa sııaqty sırek janýarlarmen tolyqqan. Qazir munda 385 túrge jatatyn 4 myńnan astam janýar bar. Olardyń edáýir bóligi halyqaralyq jáne ulttyq qorǵaý tizimine engizilgen.
Aıta keteıik, buǵan deıin sheteldik BAQ Qazaqstannyń saıası reformalary jaıynda jazǵan bolatyn.