Konstıtýtsııa jobasy: azamattar pikiri men usynysyn e-Otinish jáne eGov portaldary arqyly jiberdi
ASTANA.KAZINFORM - Konstıtýtsııalyq komıssııa búgin jańa Konstıtýtsııa jobasyn jarııalady. Onyń basty erekshelikteriniń biri – Qazaqstannyń Egemendigi men Táýelsizdigi, ýnıtarlyǵy jáne aýmaqtyq tutastyǵynyń myzǵymastyǵy ózgermeıtin qundylyqtarǵa jatqyzyldy.
Bul negizgi qaǵıda Ata zań jobasynyń «Konstıtýtsııalyq qurylys negizderi» ataýly birinshi bóliminde kórinis tapty. Munda memlekettik basqarý túrin naqtylaý qajettiligi týraly oı bildirgen birqatar ǵalymdar men mamandardyń usynysy eskerilgen. Osylaısha, Qazaqstan Respýblıkasy prezıdenttik respýblıka ekeni aıqyndalǵan.
Konstıtýtsııa jobasynyń novellalarynyń biri – Egemendiktiń jalǵyz ıesi retinde Qazaqstan halqyn bekitý normasy. Budan basqa, «respýblıkalyq referendým» túsinigi «jalpyulttyq referendým» dep ózgertilgen. Halyq óz bıligin tikeleı jalpyulttyq referendým men erkin saılaýlar, sondaı-aq memlekettik organdar arqyly júzege asyratyny týraly norma aıqyndalǵan.
Jarııalanǵan Konstıtýtsııa jobasy – qoǵam tarapynan keń ári qyzý talqylaýlardyń, azamattar, saıası partııalar, qoǵamdyq uıymdar, quqyqtanýshylar men sarapshylardyń keń aýqymdy pikirtalastarynyń nátıjesi. Talqylaýǵa beıjaı qaramaıtyn azamattar da qatysyp, jalpy sany eki myńnan asqan ózderiniń pikirleri men usynystaryn e-Otinish pen eGov portaldary arqyly jibergen.
Jańa Konstıtýtsııa jobasy qoǵam men memleket damýynyń strategııalyq mindetterine sáıkes keledi. Ol Qazaqstannyń qalyptasqan memlekettiliginiń negizderin qaıta bekitýmen birge, «Myqty Prezıdent – yqpaldy Parlament – esep beretin Úkimet» tujyrymdamasynyń logıkasyna da tolyqtaı saı keledi. Konstıtýtsııa jobasynda belgilengen erejeler memleket pen qoǵamnyń jańa evolıýtsııalyq kezeńin bastaýǵa negiz qalaıdy.
Aıta keteıik, Konstıtýtsııalyq reformalar jónindegi komıssııa Qazaqstan Respýblıkasynyń jańa Ata Zańynyń jobasyn jarııalady.