Konstıtýtsııa jobasy: Ár adamnyń memlekettik organnyń zańsyz áreketimen kelitirilgen zııandy memleketten ótetip alýǵa quqyǵy bar

ASTANA. KAZINFORM — Ár adamnyń memlekettik organnyń zańsyz áreketimen kelitirilgen zııandy memleketten ótetip alýǵa quqyǵy bar. Konstıtýtsııa jobasyna osyndaı túzetý engizilmek. Bul týraly Konstıtýtsııalyq reformalar jónindegi komıssııanyń 9-otyrysynda Konstıtýtsııalyq sot tóraǵasynyń orynbasary Baqyt Nurmuhanov aıtty. 

— Jobanyń 12-baby Qazaqstan Respýblıkasynyń azamattyǵy máselelerine arnalǵan. Osy baptyń 3-tarmaǵyna túzetý usynylady. Oǵan sáıkes, «Qazaqstan Respýblıkasynyń azamatynda qos nemese kóp azamattyǵy bolýyna jol berimeıdi. Ózge el azamattyǵynyń bolýy zańda kózdelgen tártippen jáne belgilengen jaǵdaıda Qazaqstan Respýbılkasynyń azamattyǵyn toqtatýǵa negiz bolady». Engizilgen usynystardyń ishinde memlekettik bılik organdary men olardyń qyzmetshileriniń quqyqtyq qaıshy áreketteri saldarynan keltirilgen zııannyń ótelýine árkimniń quqyǵyn Konstıtýtsııada bekitý máselesi úlken qyzyǵýshylyq tanytady, — dedi ol.

Onyń aıtýynsha, qoldanystaǵy zańnamada múliktik jáne moraldyq shyǵyndy óteý tetikteri qarastyrylǵan. Qylmystyq-protsestik kodekstiń 4-taraýy qylmystyq protsesti júrgizetin organnyń zańsyz áreketterinen keltirilgen zııandy óteý tártibin retteıdi.

— Onyń erejelerine sáıkes, adamǵa zańsyz ustap alýdyń, kúzetpen ustaýdyń, úı qamaqtyń, laýazymynan ýaqytsha shettetýdiń, arnaýly medıtsınalyq uıymǵa ornalastyrýdyń, sottaýdyń, medıtsınalyq sıpattaǵy májbirleý sharalaryn qoldaý saldarynan keltirilgen zııan bul organnyń kinási bar-joqtyǵyna qaramastan tolyq kólemde respýblıkalyq bıýdjetten óteledi. Azamattyq protsestiń 9-babynda azamattyq is boıynsha is júrgizýge qatysatyn tulǵanyń ar-namysyn qorlaıtyn nemese qadir-qasıetin kemsitetin, iskerlik bedelin kemitetin áreketterge tyıym salynǵan. Azamattyq sot isin júrgizý barysynda memlekettik organdardyń jáne laýazymdy azamattardyń zańsyz áreketterinen jeke tulǵaǵa keltirilgen moraldy zııan, jeke tulǵaǵa nemese zańdy tulǵaǵa keltirilgen zalaldar zańda belgilengen tártippen ótelýge tıis dep bekitiligen. Mundaı erejeler basqa zańdarda da bar. Osyǵan oraı Konstıtýtsııa jobasynyń 15-baby 4-tarmaqpen tolyqtyryldy. Onda «ár adamnyń memlekettik organnyń nemese onyń laýazymdy adamynyń zańsyz áreketimen ne áreketsizdigimen kelitirilgen zııandy memleketten ótetip alýǵa quqyǵy bar» dep qarastyryldy, — dedi Baqyt Nurmuhanov.