Konstıtýtsııa saıası júıeniń «oıyn erejesin» ózgertedi – quqyqtanýshy
ASTANA. KAZINFORM – Jańa Konstıtýtsııanyń ereksheligi – sheshimder ujymdyq ári ınstıtýtsıonaldyq deńgeıde qabyldanatyn bolady. Bul jónindeM.Áýezov atyndaǵy Ońtústik Qazaqstan ýnıversıtetiniń «Memlekettik-quqyqtyq pánder» kafedrasynyń meńgerýshisi Bolatbek Tleýlov málimdedi.
Onyń sózinshe, Ata zańda ókildi ınstıtýttardyń rólin kúsheıtý basymdyqqa ıe. Oǵan qosa ókilettikterdiń bir bóligin Quryltaı men saılanbaly organdarǵa berý josparlanǵan. Bul bir ortalyqta shoǵyrlanǵan basqarý modelinen bas tartyp, sheshimder ınstıtýtsıonaldyq túrde qabyldanatyn júıege kóshý degendi bildiredi.
– Nazar tek bılik qurylymyna emes, onyń qoǵam aldyndaǵy jaýapkershiligine aýdarylýy óte mańyzdy. Parlamenttiń Úkimetti qalyptastyrýǵa qatysýy, baqylaý júrgizýi jáne saıası baǵytqa yqpal etý múmkindigi artsa, memleket pen azamattar arasyndaǵy baılanys nyǵaıa túsedi. Bılikti barynsha esep beretin ári teńgerimdi etý konstıtýtsııalyq ózgeristiń negizgi máni dep sanaımyn, – dedi quqyqtanýshy.
Bolatbek Tleýlovtyń pikirinshe, Konstıtýtsııa búkil saıası júıe úshin «oıyn erejelerin» aıqyndaıdy, sondyqtan onyń jańartylýy bılik ınstıtýttarynyń qalaı jumys isteıtinin sheshpek. Memleket pen qoǵam arasyndaǵy qatynastardyń qalaı qalyptasatyny da Ata zańǵa tikeleı táýeldi.
– Eger ózgeris júzege assa, quqyq ústemdigi men saıası plıýralızmniń damýyna jol ashylady. Azamattar sheshimderdiń jabyq túrde emes, talqylaýlar men ókildi organdar arqyly qabyldanatynyn kóre bastaıdy.
Degenmen nátıje birneshe faktorǵa baılanysty ózgerýi yqtımal. Sebebi muqııat oılastyrylǵan konstıtýtsııalyq normalardyń ózi saıası mádenıetti, laýazymdy tulǵalardyń jaýapkershiligin jáne qoǵamnyń belsendi ustanymyn talap etedi. Sondyqtan Ata zańnyń jańa redaktsııasy – reformanyń sońy emes, kerisinshe, búkil saıası-quqyqtyq júıeni tereńirek jańǵyrtýdyń bastamasy, – dep túıindedi Bolatbek Tleýlov.
Buǵan deıin Qazaqstan Konstıtýtsııasy qalaı ózgeretini týraly jazǵan edik.