Konstıtýtsııa Preambýlasyn ózgertý ne úshin qajet boldy – Erlan Saırovtyń paıymy

ASTANA. KAZINFORM – Konstıtýtsııa jobasynyń Preambýlasy passıonarlyq rýhta jazylǵan. Bul týraly «Referendým-2026» onlaın marafony barysynda Májilis depýtaty Erlan Saırov aıtty.

– 30 jyldyń ishinde zaman ózgerdi. Jańa qazaq memlekettigin qalaıtyn jastar paıda boldy. Osy ýaqyt aralyǵynda qazaqtyń jańa saıası urpaǵynyń paıda bolýyna baılanysty Qazaqstan Konstıtýtsııasynyń Preambýlasyn ózgertý qajettigi týdy. Óıtkeni, 30 jyldyń ishinde qazaqtyń salt-dástúrine, ejelden kele jatqan passıonarlyq kúshine jáne sonymen birge qazaqtyń sol zamanda dúnıeni dúr silkindirgen passıonarlyq kúshtiń mırasqory ekenine tarıhı dálelder paıda boldy. Bul tarıhı dálelderdi Negizgi zańǵa engizý – búgingi tańdaǵy ómir zańdylyǵy ári óte ózekti. Sondaı-aq bolashaq urpaq Táýelsiz Qazaqstandy ary qaraı alyp júrýi úshin úlken kúsh kerek. Sol kúsh Konstıtýtsııa jobasynyń Preambýlasynda passıonarlyq rýhta jazylǵan, - dedi ol.

Onyń atap ótýinshe, Konstıtýtsııa jobasy aldaǵy 50 jylǵa baǵyttalǵan ıdeologııa sanalady.

– Sondyqtan Ata zańnyń Preambýlasy ıýrısdıktsııalyq qujat emes, bolashaqqa baǵyttalǵan rýhanı-ıdeologııalyq úlken tujyrymdama, - dedi Erlan Saırov.

Jańa Konstıtýtsııa jobasyn túsindirýge arnalǵan aqparattyq alań – «Referendým-2026» onlaın marafony barysynda Qazaqstan Zańgerler odaǵynyń tóraǵasy Serik Aqylbaı Konstıtýtsııa jobasy aldymen qazaq tilinde uǵynyqty jazylyp, keıin resmı tilge aýdarylǵanyn aıtqan edi.