Konstıtýtsııa mátinine taldaý jasaldy: jumys tobyna kimder jumyldyryldy
ASTANA. KAZINFORM — Búgin Konstıtýtsııalyq reforma jónindegi komıssııanyń otyrysynda Memlekettik keńesshi Erlan Qarın qoldanystaǵy Konstıtýtsııa mátinine qatysty ǵalymdardyń usynysyna qatysty pikir aıtty.
- Al bul jumys bireýler oılaǵandaı bir-eki apta buryn emes, birneshe aı buryn bastalǵan bolatyn. Byltyr qazan aıynda e-Otinish platformasy arqyly Nárikbaev ýnıversıtetiniń oqytýshysy Marat Ahmadıdan osyndaı usynys kelip tústi. Onda 15 betten turatyn arnaıy taldaýdy joldady. Ol taldaýda qazirgi qoldanystaǵy Konstıtýtsııadaǵy termınologııalyq turǵydan jiberilgen qatelikter men aýdarma máselesine nazar aýdaryp, kólemdi taldaý jasady. Jalpy, ár ótinishpen tanysyp otyrdyq. Marat Ahmadı jibergen usynystarmen tanysqannan keıin, ol azamatty Aqordaǵa arnaıy shaqyryp, pikir almastyq, - dedi E. Qarın.
Onyń aıtýynsha, bul turǵyda 1995 jyly qabyldanǵan Ata zań mátinindegi tildik jáne quqyqtyq-termınologııalyq qatelikterge, maǵynalyq jáne uǵymdyq dálsizdikterge, stılıstıkalyq-grammatıkalyq sáıkessizdikterge, quqyqtyq-lıngvıstıkalyq qaıshylyqtarǵa nazar aýdaryldy.
- Sodan soń Nárikbaev ýnıversıtetiniń basshysy Talǵat Maqsutulymen jolyǵyp, ýnıversıtet bazasynda Konstıtýtsııa mátinin redaktsııalaıtyn Jumys tobyn qurýǵa kelistik. Osylaısha, qarasha aıynyń basynda tıisti jumys bastalyp ketti. Jumys tobyna Nárikbaev ýnıversıtetiniń Marat Ahmadı, Nurjan Eshnııazov, Almas Jumaǵalı, Abaı Abylaıuly sekildi quqyqtanýshy ǵalymdary men bilikti oqytýshylary endi. Jeltoqsan aıynyń basynda Jumys tobyna basqa da belgili ǵalymdar men til mamandary, memlekettik organdardyń ókilderi, Parlament pen Úkimettiń bilikti qyzmetkerleri qosylyp, toptyń aýqymy keńeıdi. Atap aıtqanda, Jumys tobynyń quramyna Prezıdenttiń keńesshisi, belgili ǵalym-jýrnalıst Baýyrjan Jumahanuly Omarov, Erbol Ábdirásilov, Erbol Tileshev, Talǵat Nárikbaev, Nurlan Oqauly, Murat Qaıyrbek, Madına Ospanaly jáne basqa da azamattar qosyldy. Osy jumystyń artynda qanshama adamnyń jumysy turǵanyn kórsetý úshin bul azamattardyń aty-jónin ádeıi atap otyrmyn. Bul – osy iske atsalysyp jatqan azamattardyń bir toby ǵana, ıaǵnı kópshiliktiń talqysyna usynylǵan jańa Konstıtýtsııa jobasynyń memlekettik tildegi nusqasy boıynsha jan-jaqty júıeli jumys júrgizildi, - dedi Memlekettik keńesshi.
Osy oraıda Erlan Qarın osy jumystyń nátıjesinde jańa Konstıtýtsııanyń mátini 1995 jyly qabyldanǵan Ata Zańmen salystyrǵanda sapalyq, mazmundyq turǵydan jaqsarǵanyn jáne uǵynyqty, túsinikti bola túskenin aıtty.
- Muny áleýmettik jelidegi kóptegen azamattar moıyndap otyr. Taǵy da qaıtalap aıtamyn, bul – bir-eki aptada emes, birneshe aıǵa sozylǵan kúrdeli jumystyń nátıjesi, - dedi ol.
Osyǵan deıin Memlekettik keńesshi 1995 jylǵy Konstıtýtsııadan óreskel qateler anyqtalǵanyn aıtty.