Konstıtýtsııa kúnine oraı Qonaev qalasyndaǵy 85 otbasyǵa jańa páter kiltteri tabystaldy
QONAEV. KAZINFORM - Almaty oblysynyń ákimi Marat Sultanǵazıev «Sun City» turǵyn úı kesheninde 85 otbasyǵa jańa páter kiltterin tabys etti. Baspana 10 jyldan astam ýaqyt úı kezeginde turǵan otbasylarǵa berildi.
Páterler Konstıtýtsııa kúni qarsańynda qalanyń kommýnaldyq turǵyn úı qorynan baspana satyp alý baǵdarlamasy sheńberinde tabystaldy. Bul páterler «KazSMU» JShS júzege asyrǵan 360 páterli keshennen satyp alyndy.
Sharaǵa Almaty oblysynyń ákimi Marat Eleýsizuly qatysyp, turǵyndardy quttyqtady. Ol: «Turǵyn úımen qamtamasyz etý – memlekettik áleýmettik saıasattaǵy basymdyq. Turǵyn úı máselesine qatysty jaǵdaıdy túbegeıli ózgertý kerek. Bul suraq árdaıym jiti nazarda bolady», - dep el Prezıdenti Qasym-Jomart Toqaev baspana máselesimen qamtýǵa basa nazar aýdarǵan. Osy baǵytta Almaty oblysynda da belsendi jumystar júrgizilip jatyr. Bıyl áleýmettik osal toptarǵa arnalǵan 1304 páterdi satyp alý josparlanǵan. Onyń 55-i búginde satyp alyndy. Oblys ortalyǵynda qosymsha 145 páter satyp alynyp, áleýmettik osal topqa jatatyn azamattarǵa beriledi. Jalpy, oblys boıynsha 61 kóppáterli turǵyn úı (1618 páter) qurylysy júrgizilip jatyr. Jyl sońyna deıin 3 myńǵa jýyq oblys turǵyny jańa baspanaǵa ıe bolady dep kútilýde», - dedi Marat Eleýsizuly.
Jańa páterge ıe bolǵandardyń biri - Anar Almuratova. Kúmis alqa ıegeri bes qyz, bir ul tárbıelep otyr. Ol on jyldan beri Qonaev qalalyq aýrýhanasynda medbıke bolyp jumys isteıdi.
«Qonaevta turyp jatqanymyzǵa on jyl boldy. 2012 jyly kóship keldim. Áserimdi aıta almaımyn, tolqyp turmyn, qýanyshtymyn. Konstıtýtsııa kúni qarsańynda úı berip jatyr, balapandarymyz osy jerden sabaqqa barady. Eki bólmeli úı, 78 sharshy metr, ishi keń», - dedi Anar Almuratova.
«Sun City» turǵyn úı kesheni qalanyń jaıly ári qolaıly bóliginde ornalasqan. Ǵımarattyń qurylysy eki jyl buryn bastalyp, bıyl paıdalanýǵa berildi. 12 qabatty nysannyń aýlasy tolyq abattandyrylǵan. Balalarǵa arnalǵan sporttyq, oıyn-saýyq alańdary da ornatylypty.
«Qonaev qalasynda baspana kezeginde 1834 adam tur. Olardyń arasynda kópbalaly analar, soǵys ardagerleri, jetim balalar jáne múgedekter bar. Jyl sońyna deıin 165 páterdi Úkimet tarapynan berý josparlanyp otyr», - dedi Qonaev qalasynyń ákimi Ashat Berdihanov.
