Konstıtýtsııa kúni: Jetisaıda 100-den astam otbasy baspanaly boldy
TÚRKІSTAN. KAZINFORM - Konstıtýtsııa kúnine arnalǵan merekelik sharada turǵyn úı kezeginde turǵan az qamtamasyz etilgen jáne kópbalaly otbasylarǵa, múmkindigi shekteýli jandarǵa páter kiltteri tabystaldy.
Saltanatty sharaǵa Túrkistan oblysy ákiminiń orynbasary Beısenbaı Tájibaev, Túrkistan oblystyq máslıhatynyń tóraǵasy Nuraly Ábishov, oblystyq máslıhat depýtaty Talǵat Qarjaýov, Jetisaı aýdanynyń ákimi Serik Mamytov pen kásipker-metsenat Baharıdın Ablazımov qatysyp, kópshilikti Konstıtýtsııa kúnimen quttyqtady.
«Búgin tamasha sáttiń kýási bolyp otyrmyz. Qazaq jetimi men jesirin jylatpaǵan tekti halyq ekeni belgili. Táýelsiz eldiń búgingi azamattarynyń ishinde qanǵa sińgen qasıetti, ata dástúrdi jalǵastyryp, dáriptep kele jatqandary da barshylyq. Kóptiń kómegimen mereke qarsańynda baspanaǵa shyn muqtaj otbasylar qýanyshqa kenelip otyr. Qonys qutty bolsyn!» – dedi Beısenbaı Tájibaev.
«Jannat saraıy» dep atalatyn qos qabatty 16 páterli turǵyn úıdiń qurylysy 2022 jyly bastalǵan bolatyn. Bıyl qurylys jumystary tolyq aıaqtalyp, el ıgiligine paıdalanýǵa berildi. 16 páterdiń 12-si eki bólmeli bolsa, 4-i úsh bólmeli. Quny 350 mln teńgeni quraıdy.
Sondaı-aq, ótken jyly respýblıkalyq bıýdjet pen Ulttyq qordan qaralǵan qarjyǵa halyqtyń áleýmettik osal toptary úshin áleýmettik 90 turǵyn úı satyp alynǵan. Bul jumystar bıylǵy jylyda óz jalǵasyn tappaq.
Saltanatty shara barysynda «Baspanaǵa jol» qoǵamdyq qaıyrymdylyq qory atynan taǵy bir kópbalaly otbasy baspanaly boldy. Qor músheleri baspananyń ishin qajetti jıhazdarmen, azyq-túlikpen jáne kúndelikti tutyný zattarymen, otbasy múshelerin kıim-keshekpen tolyqtaı qamtamasyz etken.
