Konstıtýtsııa kúni: Qonaevta Memlekettik Tý 55 metrlik tuǵyrǵa kóterildi
ASTANA. KAZINFORM — Qonaev qalasynda Memlekettik Týdy 55 metrlik tuǵyrǵa kóterý saltanaty ótti, dep habarlaıdy Almaty oblysynyń ákimdigi.
Eldik pen Táýelsizdiktiń sımvolyna aınalǵan bul rásim Qazaqstan Konstıtýtsııasynyń 30 jyldyǵyna arnaldy.
Іs-shara Memlekettik Týdy alyp kirýden jáne Ánurandy oryndaýdan bastaldy. Almaty oblysynyń ákimi Marat Sultanǵazıev quttyqtaý sóz sóılep, Konstıtýtsııanyń el turaqtylyǵy men damýynyń basty kepili ekenin atap ótti.
— Ata Zańymyz — Táýelsiz Qazaqstannyń damý baǵdary men turaqtylyǵynyń kepili. Sonyń arqasynda halyqtyń ál-aýqaty artyp, áleýmettik qorǵaý júıesi nyǵaıdy, azamattardyń quqyqtyq mádenıeti qalyptasty. Almaty oblysy da turaqty ósim kórsetip keledi. Qonaev qalasynyń jańa mártebesi men Alataý qalasynyń qurylýy — óńir damýynyń aıqyn dáleli, — dep atap ótti óńir basshysy.
Merekege oraı 28 turǵyn marapattaldy. Olardyń ishinde «Qazaqstan Konstıtýtsııasyna 30 jyl» merekelik medali ıegerleri, oblys ákiminiń Qurmet gramotasy men Alǵys hattaryna ıe bolǵan azamattar bar.
Jalpy, Almaty oblysynda Konstıtýtsııanyń 30 jyldyǵyna arnalǵan 180-nen astam is-shara uıymdastyrylyp, oǵan 30 myńǵa jýyq adam qatysty.
Budan buryn endi Konstıtýtsııa mektep qabyrǵasynda oqytylatyny aıtyldy.