Konstıtýtsııa kúni qarsańynda Túrkistanda zamanaýı mektep ashyldy
TÚRKІSTAN. KAZINFORM — Saýran aýdanynda 30 tamyz — Konstıtýtsııa kúni qarsańynda 300 orynǵa arnalǵan «Keleshek mektepteri» jobasy aıasynda Sultanbek Qojanov atyndaǵy jalpy bilim beretin mektep ashyldy, dep habarlaıdy Túrkistan oblysy ákiminiń baspasóz qyzmeti.
Memleket basshysy Qasym-Jomart Toqaevtyń tapsyrmasymen salynǵan bilim uıasynyń ashylýyna oblys ákimi Nuralhan Kósherov qatysyp, bilim kúnimen jáne Ata zańymyzdyń 30 jyldyq mereıtoıymen quttyqtady.
— Jańa oqý jylynda 1-synypqa 48 myńnan astam oqýshy qabyldandy. Jyl saıyn mektep tabaldyryǵyn attaıtyn balalardyń kóbeıýi bizge úlken jaýapkershilik júkteıdi. Saýran aýdanynda 3 Keleshek mektep iske qosylyp jatyr. Bul aýdan tereń tarıhymen, eńbekqor halqymen erekshelenedi. Sondyqtan da mundaǵy árbir ıgi bastama el rýhyn kóterip, jas urpaqqa taǵylym bereri anyq. Ult qaıratkeri Sultanbek Qojanov atyndaǵy 300 oryndyq jańa bilim uıasynyń ashylýy Úshqaıyq, Jalańtós, Teke aýyl turǵyndary úshin úlken qýanysh. Balalarymyzdyń bolashaǵyna jasalǵan qoldaý, — dedi oblys ákimi Nuralhan Kósherov.
Jańa mektepte zamanaýı jabdyqtalǵan synyptarda sapaly bilim alýǵa jáne ustazdar úshin eńbek etýge barlyq jaǵdaı jasalǵan.
Eki qabattan turatyn mekteptiń jalpy aýmaǵy — 2 gektar. 115 oryndyq akt zaly men sheberhana, ashana men kitaphana, sport zaly men medıtsınalyq pýnkt bar. Beınebaqylaý kameralary ornatylǵan. Mekteptiń qurylys jumystaryn «Samruk-Kazyna Construction» AQ tapsyrmasymen «Nysh-Er» JShS júrgizdi.
Aıta ketsek, Memleket basshysy Qasym-Jomart Toqaevtyń bastamasymen qolǵa alynǵan «Keleshek mektepteri» ulttyq jobasy — el bolashaǵyna jasalǵan mańyzdy ınvestıtsııa.
Joba aıasynda óńirimizde 29 Keleshek mekteptiń qurylysy júrgizildi. Ótken oqý jylynda 13 mektep paıdalanýǵa berilse, al bıyl jańa oqý jylynda 16 mektep paıdalanýǵa tapsyrylady dep josparlanyp otyr.