Astanada «Kúıshiler» alleıasy qaıta jańǵyrtýdan keıin ashyldy
ASTANA. KAZINFORM — Elordada Konstıtýtsııa kúnine oraı aýqymdy rekonstrýktsııa men jańǵyrtýdan ótken «Kúıshiler» alleıasy saltanatty túrde ashyldy, dep habarlaıdy qala ákimdiginiń resmı saıty.
Alleıa Abylaı han dańǵyly boıynda ornalasqan jáne aýmaǵy shamamen 25 000 sharshy metrdi quraıdy.
Qoǵamdyq keńistikti kúrdeli jóndeý eki aıǵa sozyldy. Munda eski kespetastar tósemi uzaqqa shydaıtyn granıt tasqa aýystyrylyp, kógaldandyrý júrgizildi, tireýish qabyrǵalar ornatylyp, kópjyldyq butalar men shyrshalar egildi. Sondaı-aq zamanaýı jergilikti sýarý júıesi iske qosyldy. Avtoturaq aımaǵy da aıtarlyqtaı keńeıtilip, asfaltbeton jabyny tolyq jańartyldy.
Turǵyndardyń jaılylyǵy úshin keń kólemdi balalar alańy qaýipsiz jabynmen jáne shaǵyn arhıtektýralyq nysandarmen jabdyqtaldy. Sondaı-aq, vorkaýt jáne jattyǵý aımaqtary, oryndyqtar men qoqys jáshikteri, kóleńkeli shatyrly oryndyqtar men eresekterge arnalǵan jaıly besedkalar ornatyldy. Alleıa aýmaǵynda qoǵamdyq dárethana da qarastyrylǵan.
— Alleıaǵa «Kúıshiler» ataýy qobyzda oınaǵan kórnekti halyq mýzykanttary men kompozıtorlarynyń qurmetine berildi. Olardyń esimderi qashalyp jazylǵan mármár taqta ornatylyp, bul keńistikke mádenı mán-maǵyna men sımvolıkalyq mazmun berip tur, — dedi Almaty aýdany ákimi apparatynyń abattandyrý bólimi basshysy Danııar Qojahmetov.
Aıta keteıik, bıyl elordada shamamen 170 aýla men qoǵamdyq keńistik (saıabaqtar, gúlzarlar, jelekjoldar) abattandyrylyp jatyr. Bul jumys barlyq aýdandy, onyń ishinde turǵyn alaptardy da qamtıdy. Qazirgi tańda onyń basym bóligi aıaqtaldy.
Osydan buryn Astanada jańa saıabaǵy men demalys aımaǵy bar qoǵamdyq keńistik salynyp jatqanyn jazǵan edik.