Konstıtýtsııa qabyldanýyna baılanysty birqatar azamat memlekettik nagrada aldy
ASTANA. KAZINFORM — Jańa Konstıtýtsııanyń qabyldanýyna oraı birqatar qoǵam qaıratkeri memlekettik nagradalarmen marapattaldy, dep habarlaıdy Aqordanyń baspasóz qyzmeti.
Memleket basshysynyń Jarlyǵymen eldiń saıası, áleýmettik-ekonomıkalyq damýyna qosqan eleýli úlesi jáne belsendi qoǵamdyq qyzmeti úshin birqatar qoǵam qaıratkeri memlekettik nagradalarmen marapattaldy.
Jańa Konstıtýtsııanyń qabyldanýyna oraı Memlekettik keńesshi Erlan Qarın Prezıdent atynan Konstıtýtsııalyq komıssııanyń birqatar múshesine, BAQ jáne qoǵam ókilderine memlekettik nagradalar tapsyrdy.
Atap aıtqanda, Konstıtýtsııalyq sot sýdıasy Qaırat Jaqypbaev ІІІ dárejeli «Barys» ordenimen marapattaldy.
Konstıtýtsııalyq sot tóraǵasynyń orynbasary Baqyt Nurmuhanov, Prezıdent janyndaǵy Ortalyq kommýnıkatsııalar qyzmetiniń dırektory Asqar Omarov, Prezıdent janyndaǵy Qazaqstan strategııalyq zertteýler ınstıtýtynyń dırektory Jandos Shaımardanov, M.S. Nárikbaev atyndaǵy QazGZÝ basqarma tóraǵasy Talǵat Nárikbaev, «Ulttyq rýh» qoǵamdyq birlestiginiń jetekshisi Aıat Súgirbaı «Parasat» ordenine ıe boldy.
Jibek Joly telearnasynyń dırektory Erkejan Kúntýǵan «Qurmet» ordenimen nagradtaldy.
M.S. Nárikbaev atyndaǵy QazGZÝ ýnıversıtetiniń professory Almas Jumaǵalı, Uni-Q Group medıaholdınginiń bas dırektory Muhamedqalı Taýan «Eren eńbegi úshin» medalimen marapattaldy.
Prezıdent janyndaǵy Qazaqstan strategııalyq zertteýler ınstıtýtynyń bólim basshysy Janar Sanhaevaǵa, Prezıdenttik mádenıet ortalyǵynyń mamany Dastan Qonysbaevqa Qazaqstan Respýblıkasy Prezıdentiniń Alǵysy jarııalandy.
Erlan Qarın marapat ıelerin quttyqtap, referendýmda azamattarymyz qabyldaǵan jańa Konstıtýtsııa bizdiń qoǵamnyń prezıdenttik reformalar tóńiregine toptasyp, tutasa túsetinin taǵy bir márte rastaǵanyn atap ótti.
Budan buryn Qasym-Jomart Toqaev eldiń áleýmettik-ekonomıkalyq damýyna, zań men tártipti nyǵaıtýǵa qosqan eleýli úlesi úshin bir top azamatqa memlekettik nagradalar tabystaǵanyn jazǵanbyz.