Konstıtýtsııa — halyq tańdaýy, memleket tiregi — kórme
ASTANA. KAZINFORM — Elordadaǵy Tuńǵysh Prezıdent mýzeıinde Konstıtýtsııa kúni qarsańynda erekshe kórme ashyldy.
«Konstıtýtsııa — halyq tańdaýy, memleket tiregi» atty kórme «Dáýir jasampazdary / Zamandastar» tarıhı-memorıaldyq jobasy aıasynda iske asyryldy.
Uıymdastyrýshylardyń aıtýynsha, ekspozıtsııa qazirgi Qazaqstan memlekettiliginiń quqyqtyq negizine aınalǵan memlekettik egemendik týraly deklaratsııany jáne 1995 jylǵy Konstıtýtsııaǵa deıingi memlekettik táýelsizdik týraly Konstıtýtsııalyq zańdy qabyldaýdan bastap táýelsiz Qazaqstannyń saıası-quqyqtyq qalyptasýynyń negizgi kezeńin kórsetedi.
Ótpeli kezeńniń ıntellektýaldy jáne saıası shıelenisin kórsetetin 1995 jylǵy saraptamalyq-konsýltatıvtik keńestiń jumysy ortalyq oryndy alady.
Ekspozıtsııada Qazaqstan Respýblıkasy Tuńǵysh Prezıdentiniń jeke arhıvinen qujattar, ıaǵnı N.Á. Nazarbaevtyń túzetýleri bar túpnusqa qoljazbalar, avtorlyq túsiniktemeleri bar Konstıtýtsııa jobasynyń jumys nusqalary, sondaı-aq quqyq jáne memlekettik qurylys salasyndaǵy jetekshi álemdik mamandardyń saraptamalyq qorytyndylary men usynystary usynylǵan.
— Konstıtýtsııa kúnine oraı uıymdastyrylǵan kórmeniń orny erekshe, sebebi bul jerde arhıv jáne mýzeı materıaldary qoıylǵan. Búgingi kórmede 1995 jyly qabyldanǵan Konstıtýtsııany ázirleý barysynda jasalǵan jobalardy alǵash tolyǵymen kórsetip otyrmyz. Arhıv materıaldarynyń qundylyǵy referendým ótkizer aldynda 3 qatysýshynyń 33 myń usynysy men ózgerisi negizinde ata zańnyń bes baby tolyǵymen ózgertildi, — dedi Tuńǵysh Prezıdent mýzeıiniń dırektory Kúláıshá Aqtaeva kórmeniń ashylý saltanaty barysynda.
Osylaısha, tarıhı materıaldardyń túpnusqasy jurtshylyqtyń nazaryna alǵash usynylyp otyr.
— Konstıtýtsııanyń qundylyǵy men mańyzyn kórsetip otyrmyz. Zańgerler, tarıhshylardyń birlesip istegen jumysynyń nátıjesinde shyǵarylǵan materıaldar, bizdiń qordaǵy kitaptar jáne Ulttyq kitaptar palatasynan alynǵan biraz materıal, gazetter jáne beınematerıaldar bar, — deıdi ol.
Sondaı-aq kórme materıaldary qazaq quqyqtyq sanasynyń dástúrin qazirgi konstıtýtsıonalızm qaǵıdatymen baılanystyratyn dınamıkalyq quqyqtyq qural retinde Konstıtýtsııanyń evolıýtsııasy kontekstindegi saıası júıeniń transformatsııasyn kórsetedi.
Aıtýly is-sharaǵa Konstıtýtsııalyq keńes músheleri, ǵalymdar, tarıhshylar, zańgerler, qoǵam qaıratkerleri, depýtattar men jastar qatysty.
Elorda turǵyndary men qonaqtary atalǵan kórmeni Á. Bókeıhan kóshesi 1 mekenjaıynda ornalasqan Tuńǵysh Prezıdent mýzeıinen tamashalaı alady.
Buǵan deıin Astanada Konstıtýtsııanyń 30 jyldyǵy qalaı atap ótiletini týraly jazǵan edik.