Konstıtýtsııa – el táýelsizdiginiń berik tuǵyry
ORAL. KAZINFORM – Oral qalasyndaǵy «Atameken» óner ordasynda Qazaqstan Respýblıkasynyń Konstıtýtsııasy kúnine arnalǵan saltanatty jıyn ótti. Bul mereke – eldiń táýelsizdigi men quqyqtyq memleket qundylyqtaryn aıshyqtaıtyn mańyzdy data. Іs-sharaǵa memlekettik organdardyń ókilderi, ardagerler, qoǵam qaıratkerleri men jastar qatysty.
Saltanatty sharada Batys Qazaqstan oblysynyń ákimi Narıman Tóreǵalıev óz sózinde Ata Zańnyń mán-mańyzyna erekshe toqtaldy.
«Osydan otyz jyl buryn búkilhalyqtyq referendým arqyly qabyldanǵan Konstıtýtsııa – Táýelsiz Qazaqstannyń berik tuǵyry. Ol eldiń birligin nyǵaıtyp, qoǵamdaǵy turaqtylyqty ornyqtyrdy, árbir azamattyń quqyǵy men bostandyǵyn qorǵaýdyń senimdi kepiline aınaldy», – atap ótti óńir basshysy.
Sonymen qatar, N. Tóreǵalıev Memleket basshysy Qasym-Jomart Toqaevtyń Konstıtýtsııanyń tarıhı mańyzyna bergen joǵary baǵasyn da eske saldy. Prezıdent atap ótkendeı, qazaq halqy ejelden zańǵa qurmetpen qarap, ádildik pen adamgershilikti bıik qoıǵan. Qasym hannyń qasqa joly, Esim hannyń eski joly, Áz Táýkeniń Jeti jarǵysy – Uly dalanyń jazylmaǵan konstıtýtsııasy bolyp, memlekettilik dástúrin qalyptastyrǵan.
Jıyn barysynda eldiń áleýmettik-ekonomıkalyq damýyna jáne qoǵamdyq ómirge eleýli úles qosqan birqatar azamatqa «Qazaqstan Respýblıkasynyń Konstıtýtsııasyna 30 jyl» merekelik medali tabys etildi.
Saltanatty shara Konstıtýtsııa kúnine arnalǵan merekelik kontserttik baǵdarlamaǵa ulasyp, óńirdiń óner ujymdary arnaıy qoıylymdaryn usyndy.
Aıta keteıik, BQO-daǵy baıqaýda 88 jastaǵy aqsaqaldyń áýleti jeńimpaz atandy.