Konstıtýtsııa árdaıym adam quqyǵynyń temirqazyǵy bolýǵa tıis – Prezıdent
ASTANA. KAZINFORM - Prezıdent Qasym-Jomart Toqaev QR Konstıtýtsııasynyń 30 jyldyǵyna arnalǵan konferentsııada sóılegen sózinde osylaı dedi, dep habarlaıdy Aqordanyń baspasóz qyzmeti.
«Jalpy aıtqanda, biz memlekettik saıasatta tereń ózgeris jasadyq. Konstıtýtsııalyq reforma osy aýqymdy jumystyń berik quqyqtyq arqaýy boldy. Sol arqyly saıasatta, ekonomıkada, áleýmettik salada, sot júıesinde «Ádiletti memleket» qaǵıdatyn júzege asyrýǵa jol ashyldy. Konstıtýtsııada jer jáne barlyq tabıǵı resýrstar halyqqa tıesili ekeni aıqyn kórsetilgen. Osy qaǵıdatty is júzinde oryndaý úshin mańyzdy sharalar qabyldandy.
Meniń tapsyrmammen «Ulttyq qor – balalarǵa» baǵdarlamasy ázirlendi. Qordyń jyl saıynǵy ınvestıtsııalyq tabysynyń jartysy balalardyń arnaıy esepshotyna jiberiletin boldy. Byltyrdan beri Ulttyq qordan 1,5 mıllıard dollardan astam qarjy bólindi. Bul – jas urpaqtyń bolashaqqa nyq senimmen qaraýyna múmkindik beretin memleketimizdiń óte mańyzdy sheshimi.
Munyń bári – jańarǵan Konstıtýtsııanyń jemisi. Ata zań, shyn máninde, azamattardyń quqyqtary men múddelerin qorǵaıtyn tolyqqandy ári tıimdi quralǵa aınaldy,-dedi Memleket basshysy.
Sondaı-aq ol sózinde birqatar mańyzdy zańdar men arnaıy josparlardy qabyldaý arqyly qoldanystaǵy Konstıtýtsııanyń orasan zor áleýeti iske asyrylyp jatqanyna toqtaldy.
Byltyr Adam saýdasyna qarsy is-qımyl týraly zań qabyldandy. Bul adamdy erkinen tys qandaı da bir jolmen paıdalanýǵa bolmaıtynyna kepildikti kúsheıtti.
Turmystyq zorlyq-zombylyq úshin beriletin jaza edáýir qatańdatyldy. Nekelesýge májbúrlegeni úshin qylmystyq jaýapkershilik belgilendi. Adam urlaǵandar da qatań jazalanady.
Sonymen qatar qylmystyq sot úderisin izgilendirý jáne onyń tıimdiligin arttyrý úshin naqty qadamdar jasaldy, tıisti kodeksterge aýqymdy túzetýler engizildi.
Konstıtýtsııanyń mereıli belesine oraı Raqymshylyq týraly zań qabyldandy. Sebebi memleket qylmyspen kúres saıasaty men áleýmettik ádildik máselesine kelgende adamgershilik qundylyqtaryn basty orynǵa qoıady.
Konstıtýtsııa árdaıym adam quqyǵynyń temirqazyǵy bolýǵa tıis. Bul – memleket saıasatyndaǵy buljymas qaǵıda. Konstıtýtsııamyz aldaǵy ýaqytta da halqymyzdyń jarqyn bolashaǵyna jol ashatyn eń basty qujat bolyp qala bermek.
Ata zań elimizdiń jalpyulttyq biregeıligin nyǵaıtýdy, sondaı-aq zańdy múltiksiz saqtaý jáne adal azamat ıdeologııasyn ilgeriletýdi kózdeıtin jańa qoǵamdyq kelisimniń aıqyn nyshanyna aınaldy. Zań ústemdigi – ádiletti qoǵam qurýǵa jáne azamattarymyzdyń berekeli ómirin qamtamasyz etýge aparatyn tóte jol. Sondyqtan taǵy da qaıtalap aıtamyn: elimizdiń barlyq azamattary zańdy qurmettep, saqtaýy kerek.
Qazaqstannyń zańgerler qaýymdastyǵy azamattarymyzǵa Konstıtýtsııanyń negizgi erejelerin túsindirip, Zań men tártip qaǵıdatyna saı qoǵamdaǵy árbir áreketine jaýapkershilikpen qaraýǵa úndeýi qajet.
Qazaqstan Konstıtýtsııasy ultymyzdyń kemeldigi men bolashaqqa umtylysyn búkil álemge pash etedi.
- Konstıtýtsııanyń ár joly men rýhyn saqtaý, sonyń negizinde joǵary quqyqtyq mádenıet pen ulttyń jańa sapasyn qalyptastyrý – elimizdiń keleshektegi tabysynyń kepili. Muny barsha halyq túsinýge tıis, - dedi prezıdent.
Osyǵan deıin Memleket basshysy bılikke jańa býyn ókilderi kelip jatqany týraly aıtty.