Konstıtýtsııanyń basty avtory - Qazaqstan halqy men onyń Tuńǵysh Prezıdenti - Elbasy N.Nazarbaev
Sonyń ishinde 1995 jyldyń 30 tamyzyndaǵy Konstıtýtsııany qabyldaýdyń mańyzy aıtarlyqtaı erekshe bolmaq. Eldegi saıası ózgeristerge oraı, sol jyly Prezıdent N. Nazarbaevtyń bastamasymen sarapshylar toby qurylyp, olar álemniń kóptegen elderiniń Konstıtýtsııalaryn, ásirese HH ǵasyrdyń ekinshi jartysynda qabyldanǵan Negizgi Qujattardy muqııat saraptaýdan ótkizdi. Sarapshylar tobynyń ǵalymdary, saıasatkerler ǵana emes, bul iske Elbasy da etene aralasty. Tipti, osy istiń tizgini Memleket basshysynyń qolynda boldy, Prezıdent te buǵan barynsha jan-jaqty daıyndyqpen keldi desek jańylmaspyz.
«Biz úshin damýdyń ár túrli satylarynda turǵan, san alýan áleýmettik-mádenı, ulttyq jáne basqa da erekshelikteri, ár túrli quqyqtyq júıesi bar elderdiń Konstıtýtsııasy basty máseleni - turaqtylyqty nyǵaıtýdaǵy, halyqtyń ál-aýqatyn jaqsartýdaǵy jáne demokratııany damytýdaǵy qol jetken tabystaryn uǵyný mańyzdy boldy. Іzdenis geografııasy da aýqymdy bolatyn - ol Eýropany, Azııany, Soltústik jáne Latyn Amerıkasyn qamtydy. Men óz basym tikeleı álemdegi jıyrma eldiń konstıtýtsııasyn taldap, olardan konspekti jasap aldym. Nátıjesinde, jańa Konstıtýtsııanyń qajettigi týraly sheshim qabyldamas buryn bizde bes jyldyq jınaqtalǵan tájirıbe boldy. Biz sodan negizgi basymdyqtardy, maqsattardy ajyratyp, olarǵa jetýdiń quraldaryn úırendik. Konstıtýtsııany qabyldaý qarsańynda ondaǵan jyldar boıy azamattarymyzdyń oı-sanasynda qordalanyp qalǵan stereotıpterdi joıý úshin, memleket pen qoǵamdy túbegeıli reformalaý barysynda paıda bolatyn kóptegen obektıvti jáne sýbektıvti problemalardy sheshý úshin birneshe jylǵa sozylǵan tabandy jumystar atqarýǵa týra keldi. Iá, keıde bizdiń sheshimderimiz jartykesh, ymyrashyl sıpatta da boldy. Kez kelgen jańa iste bolatyny sııaqty, qatelikter de jiberiletin. Osynyń bári sol kezderde anyq ótpeli sıpatta bolǵan memlekettik ınstıtýttar men zańnamalyq qyzmetterden kórinis taýyp otyrdy. Biraq, sol bir qıyn-qystaý jyldardy eske alǵanda, elimizdi kúrdeli áleýmettik kataklızmderge soqtyrmaı, aman saqtap, álemdik qaýymdastyqtyń teń quqyqty múshesi retindegi osy zamanǵy memleket qurý úshin ne kerektiń bárin istegenime, memleketti qurýǵa qyzmet jasaǵanyma senimdimin», - dep jazady Elbasy Nursultan Ábishuly.
1995 jylǵy Konstıtýtsııany talqylaý kezeńinde elimizdegi bedeldi zańgerlerden bólek, Frantsııanyń Konstıtýtsııalyq keńesiniń ókilderi, osy eldiń Memlekettik Keńesiniń músheleri, Reseı zertteý ortalyǵynyń eń bedeldi zańgerleri jobalyq jumystyń joǵary talqylaý sharalaryna atsalysty. Aıta keteıik, táýelsizdik tarıhynda tuńǵysh ret búkilhalyqtyq talqylaýǵa salynǵan da, eldiń kóptegen pikiri eskerilgen Negizgi Zań da osy - 1995 jyly qabyldanǵan Konstıtýtsııa. Qazir keltirilip júrgen resmı málimetterge qarasaq, qujatty talqylaýǵa 3 mln. 345 myń adam qatysypty. Jurtshylyq tarapynan saraptalǵan 31 myń 886 usynys tússe, sonyń 1 myń 100-i konstıtýtsııa jobasyna engizilgen. Bul jóninde Elbasy: «1995 jylǵy Konstıtýtsııa taqyr jerde paıda bolǵan joq. Ol egemen Qazaqstanda konstıtýtsııalyq qurylys ornatý úshin burynnan jınaqtalǵan tájirıbelerdi, sondaı-aq bizdiń jaǵdaıymyzǵa sáıkes keletin eń progresshil sheteldik tájirıbelerdi barynsha tolyq paıdalanǵan edi. Sondyqtan da, kimde-kim elimizdiń Negizgi zańynyń rýhy men mańyzyn tereń túsingisi kelse, ony jasaýdyń, qalyptastyrýdyń tarıhyn jaqsy bilýi kerek», - degen bolatyn.
Sóıtip, Tuńǵysh Prezıdenttiń ózi bastama ári yntalylyq jasap, sol kezderi Eýropa men Azııanyń, Soltústik jáne Latyn Amerıkasynyń barlyǵy 20-dan astam damyǵan jáne damýshy elderiniń konstıtýtsııalaryn zerttep, saralap, zerdelep shyqty. Sosyn 1994 jyly óz qolymen Ádilet mınıstrligine jańa konstıtýtsııanyń jobasyn tapsyrǵan bolatyn. Naq osy úlgi-joba búgingi Ata zańymyzdyń negizin qalaǵan edi. Endeshe, 1995 jyly qabyldanǵan Konstıtýtsııanyń da basty avtory - Qazaqstan halqy men onyń Tuńǵysh Prezıdenti - Elbasy N.Nazarbaev dep tolyq senimmen aıtýǵa bolady.