Konstıtýtsııanyń baptary ózgergennen keıin biraz másele sheshimin tabady - depýtat
«Qazaqstannyń qasıetti jeriniń árbir pushpaǵy bizge ystyq. Jerdiń qadir-qasıetin sol jermen júrgende, aıaǵyńdy alys ta jaqyn, árbir qutty mekenge tiregende sezinesiń. Sol qasıetti jerdiń, jer ústindegi, jer astyndaǵy resýrstar qanshalyqty bizdiń halqymyzǵa tıesili? Árbir aımaqtaǵy jer asty resýrstarynan jergilikti halyq qanshama paıda taýyp otyr? Mańǵystaý, Atyraýdaǵy munaıdan, Jezqazǵan, Balqash mysynan, altynynan qazaǵym, jergilikti qazaǵym qandaı paıda tabýda? Bul jaqtyń paıdaly qazbalaryn paıdalana otyryp astanany saldyq, EKSPO ótkizdik, neshe túrli konferentsııa, sımpozıým ótkizdik. Al, jergilikti halyq óz úlesin ala aldy ma? Mektep, jol, bolnıtsa salyndy ma? Jergilikti joldar qandaı jaǵdaıda? ShQO, Zaısan aýdanynda gaz ashylǵan, sol gazdyń 3 paıyzy ǵana jergilikti halyqtyń ıgiligine jumsalǵan», - dedi Erlan Saıyrov.
Depýtatttyń aıtýynsha, bul ádilettilik prıntsıpterine sáıkes kelmeıdi.
«Iá, ınvestorlardyń quqyn qorǵaý kerek, olardy tartý kerek. Investorsyz ekonomıkaǵa qan júrmeıdi. Bul túsinikti. Degenmen, naqty eldi mekendegi jer men jer qoınaýy sol jerdiń halqynyń moraldyq enshisi ekendigin umytpaý kerek. «Jer, jer qoınaýy, tabıǵat resýrstary halyq menshigi» degen Konstıtýtsııanyń jańa postýlaty osy suraqqa jaýap beredi. Bolashaqta, qandaıda bolmasyn jer qoınaýy resýrstaryn ıgergen kezde, jergilikti halyqtyń muń-muqtajy, múddesi bólek aıqyndalyp, zańmen qorǵalýy tıis. Óıtkeni, keıbir «ózimizdiń» olıgarhııalyq toptar, alys, shalǵaı jatqan, ózderi árez kúneltip otyrǵan aýdandarda gaz, altyn, mys óndirýde. Ol jaqta jergilikti halyqtyń jaǵdaıy óte nashar! Jol joq, ınternet joq, baılanys joq. Al, álgi «dókeıler» jergilikti bıýdjetke kók tıyn bermeıdi, jergilikti halyqty jumysqa almaıdy. Jergilikti bılikti, halyqty adam sanamaıdy», - dedi ol.
Saıyrovtyń aıtýynsha, aýyr júk tasýshy mashınalarymen joldaryn buzady.
«Olardyń jumysyn tekserýge qarapaıym halyqqa ákireńdep turatyn polıtsııa, prokýratýra qaýqarsyz. Referendým osy úshin kerek. Konstıtýtsııanyń baptary ózgergennen keıin osy sııaqty biraz másele sheshimin tabady», - dedi depýtat.
