Konstıtýtsııanyń 91-babyna eshqashan, eshqandaı ózgeris engizilmeıdi - Jaqsybekov
ASTANA. QazAqparat - Konstıtýtsııanyń 91-babyna eshqashan, eshqandaı ózgeris engizilmeıdi. Bul jaıynda búgin Parlament palatalarynyń birlesken otyrysynda QR Prezıdenti Ákimshiliginiń basshysy, bılik tarmaqtary arasyndaǵy ókilettikti qaıta bólý jónindegi jumys tobynyń jetekshisi Ádilbek Jaqsybekov málim etti, dep habarlaıdy QazAqparat.
Otyrys barysynda Májilis depýtaty Baqytjan Ábdiraıym halyqpen kezdesýler barysynda eńkeıgen qarttan kishkene balaǵa deıin Táýelsizdigimizdi qorǵaý máselesine qatysty ártúrli suraqtar qoıatyndyǵyn atap ótti.
«Jalpy, jurtshylyq Konstıtýtsııanyń 91-babyna ózgerister engizýdi tolyqtaı qoldap otyr. Osyǵan oraı Táýelsizdigimizdi, ıaǵnı memlekettik Táýelsizdigimizdi qorǵaý jáne qamtamasyz etý úshin jumys toby naqty qandaı sharalar usynady?» - dep surady Baqytjan Ábdiraıym Prezıdent ákimishiligi basshysynan.
«Bul týraly baıandamada da aıttym. Osy másele boıynsha bizge de kóptegen suraqtar qoıyldy, usynystar keldi. Sondyqtan Prezıdent 91-bapqa Táýelsizdik negizgi qundylyq dep engizdi. Biz bul máseleni osylaı sheshtik. Osy bapqa eshqashan, eshqandaı ózgeris jasalmaıdy», - dep jaýap berdi Ádilbek Jaqsybekov.
