Konstıtýtsııanyń 78-babyn júzege asyrýǵa arnalǵan zań qabyldandy - Parlament
ASTANA. 27 maýsym. QazAqparat - Búgin QR Parlamenti Májilisiniń Tóraǵasy Nurlan Nyǵmatýlınniń tóraǵalyǵymen ótken palatanyń jalpy otyrysynda depýtattar «Qazaqstan Respýblıkasynyń keıbir zańnamalyq aktilerine Qazaqstan Respýblıkasy Konstıtýtsııasynyń 78-babyn iske asyrý máseleleri boıynsha ózgerister men tolyqtyrýlar engizý týraly» zań jobasyna senatorlar engizgen túzetýlerdi qarady.
Talqylaý barysynda Májilis atalǵan qujatty qabyldady. Endi zań Memleket basshysynyń qol qoıýyna jiberiledi.
Eske salsaq, atalǵan jobaǵa Májilis depýtattary bastamashylyq jasaǵan bolatyn. Sondaı-aq, qujat QR Konstıtýtsııasynyń 78-babyn qoldanýǵa baılanysty qoldanystaǵy keıbir zańnamalyq aktilerdegi olqylyqtardy joıý maqsatynda ázirlengen. Atap aıtqanda, Ata zańnyń 13-babynda belgilengen árkimniń sotta qorǵalý quqyǵy adamnyń jáne azamattyń konstıtýtsııalyq quqyqtaryn, bostandyqtary men zańdy múddelerin qamtamasyz etýdiń kepildigi bolyp tabylady. Al, mundaı konstıtýtsııalyq quqyq, sondaı-aq sottardyń QR Konstıtýtsııalyq Keńesine júginý múmkindigi jolymen iske asyrylýy múmkin. Qazaqstan Respýblıkasynyń Konstıtýtsııasynyń 78-baby naqty qylmystyq jáne azamattyq isterdi, sondaı-aq ákimshilik quqyq buzýshylyq týraly isterdi qaraý kezinde Konstıtýtsııalyq Keńeske júginýiniń quqyqtyq sharttaryn jasaıdy.
Sonymen birge depýtattar konstıtýtsııanyń atalǵan babynyń erejelerin iske asyrý is júrgizý zańnamasynda oryn alǵan olqylyqtarmen qıyndatylǵanyn, onda Qazaqstan Respýblıkasy Konstıtýtsııalyq Keńesiniń normatıvtik-quqyqtyq aktini nemese onyń bólikterin konstıtýtsııalyq emes dep tabýdyń quqyqtyq saldary rettelmegenin alǵa tartady. Osyǵan oraı, zań jobasyn qabyldaý sottyń Konstıtýtsııalyq Keńeske júginýine baılanysty sot isin júrgizýde týyndaıtyn birqatar quqyqtyq qatynastardy retteýge múmkindik beretini kózdelgen bolatyn.
Al Senattaǵy talqylaýlar barysynda zań jobasyna birqatar ózgerister engizilgen. Atap aıtqanda, senatorlar quqyq qoldanýshy organdar bolyp tabylatyn memlekettik organdar men laýazymdy tulǵalardyń tizbesin naqtylap, odan basqa da ózgerister jasady. Bular qujattyń tujyrymdamasyna esh áser etpeıtin bolǵandyqtan, Májilis Senat engizgen túzetýlerge kelisimin berdi.
