Konstıtýtsııalyq zańǵa «QR Tuńǵysh Prezıdenti - Elbasy - Qazaqstan Respýblıkasynyń negizin qalaýshy» degen ózgertý engizildi
ANA. Mamyrdyń 13-i. QazAqparat /Qanat Mámetqazyuly/ - QR Parlamenti qabyldaǵan zań boıynsha konstıtýtsııalyq zańǵa «QR Tuńǵysh Prezıdenti - Elbasy - Qazaqstan Respýblıkasynyń negizin qalaýshy» degen ózgertý engizildi. Bul týraly búgin QR Parlamenti Senatynyń jalpy otyrysynda málim boldy,
dep habarlaıdy QazAqparat.
Qujattyń bastamashysy bolǵan Májilis depýtaty Rozaqul Halmuradovtyń aıtýynsha, Parlament qabyldaǵan zańnamada respýblıka Tuńǵysh Prezıdentiniń-Elbasynyń aıryqsha tarıhı mıssııasyna baılanysty, onyń mártebesin, ókilettigin naqtylaý men qyzmetin qamtamasyz etý kepildigin qarastyrý kózdelgen.
«Atap aıtqanda, qoldanystaǵy «QR Tuńǵysh Prezıdenti týraly» Konstıtýtsııalyq zańnyń kirispesinde Tuńǵysh Prezıdent «Táýelsiz Qazaqstan Respýblıkasynyń negizin qalaýshylardyń biri» dep kórsetilgen. Sol sózderdi «Qazaqstan Respýblıkasynyń negizin qalaýshy» dep ózgertý usynylady. Tuńǵysh Prezıdenttiń - Elbasynyń mártebesin «Qazaqstan memlekettiligin qurýdyń bastaýynda turǵan jáne demokratııalyq zaıyrly quqyqtyq jáne áleýmettik memleket retinde egemen Qazaqstandy damytýǵa asa zor úles qosqan QR Tuńǵysh Prezıdenti-Elbasy bolyp tabylady», dep aıqyndaý qarastyryldy», dedi R. Halmuradov.
