Konstıtýtsııalyq sottyń jumys mehanızmi qandaı bolmaq

ASTANA. QazAqparat – Ádilet vıtse-mınıstri Alma Muqanova Konstıtýtsııalyq sottyń jumys mehanızmin túsindirdi, dep habarlaıdy QazAqparat tilshisi.

«Endi azamattar Konstıtýtsııaǵa sáıkes kelmegen quqyqtyq-normatıvtik aktiler týraly qarama-qaıshy pikirler men sheshimder boıynsha Konstıtýtsııalyq sotqa júgine alady. Bul oraıda «QR Konstıtýtsııalyq Soty týraly» Zańynda kórsetilgen birneshe talap qoıylady.

Birinshiden, azamattar naqty quqyqtyq-normatıvtik aktiler boıynsha sot organdaryna júgingen bolýy tıis, ıaǵnı apellıatsııalyq deńgeıge jetken, sot sheshimi shyǵarylǵan bolýy kerek. Eger qaraýǵa kelgen is boıynsha Joǵarǵy sottyń normatıvtik qaýlysy bolsa jáne azamattardyń basqa sot organdaryna júginýge múmkindigi bolmasa, onda olar Konstıtýtsııalyq sotqa tikeleı júgine alady. Talap etiletin qujattar «QR Konstıtýtsııalyq soty týraly» Zańynda jazylǵan.

Sonymen qosa, azamattarymyz quqyqtyq-normatıvtik aktilerdiń naqty kelispeıtin bóligin kórsetip, ózderiniń oǵan qatysty paıymyn berip, onyń Konstıtýtsııamyzdyń qandaı baptaryna qarama-qaıshy ekenin kórsetýi qajet», - dep túsindirdi Alma Muqanova ortalyq kommýnıkatsııalar qyzmetinde ótken brıfıngide.

Spıkerdiń aıtýynsha, Konstıtýtsııalyq sotqa túsken shaǵym 3 aı qaralady. Aldymen, sot apparaty azamattyń qujattary men onyń kelispegen sheshimin tekserip, tirkeýge alady.

«Shaǵym túsken soń, ári qaraı Konstıtýtsııalyq sottyń apparaty tıisti tekseris júrgizedi. Shaǵym tirkelgen jaǵdaıda, isti aldyn ala qaraý beligilenedi. Eger ýaqytqa toqtalatyn bolsaq, sotqa júgingen azamattyń shaǵymy túsken kúnnen bastap 3 aı ishinde qaralady», - dep túıindedi vıtse-mınıstr.

Eske salaıyq, ótken aıda Senat «QR Konstıtýtsııalyq Soty týraly» Zańdy qabyldaǵan edi.