Konstıtýtsııalyq Sottyń sheshimin memlekettik organdar oryndaýǵa mindetti - Máýlen Áshimbaev

ASTANA. QazAqparat – Senat tóraǵasy Máýlen Áshimbaev Konstıtýtsııalyq Sottyń tóraǵasy men sýdıalarynyń taǵaıyndalýyna qatysty pikir bildirdi, dep habarlaıdy QazAqparat tilshisi.

«Búgin Konstıtýtsııalyq Sottyń tóraǵasy qyzmetine Elvıra Ábilhasymqyzynyń taǵaıyndalýyna Senat óziniń kelisimin berdi. Ol bilikti maman retinde tanyldy. Jańa adamdardyń jaýapty laýazymdarǵa taǵaıyndalýy atalǵan organnyń tıimdi jumys isteýine tikeleı áser etedi dep senemiz. Munymen qosa, búgin Konstıtýtsııalyq Sottyń sýdıalary taǵaıyndaldy. Bul júıege jas mamandar kelip jatyr», - dedi M. Áshimbaev.

Onyń aıtýynsha, Konstıtýtsııalyq Sot memlekettegi eń negizgi organdardyń biri bolady.

«Eger adamdardyń, jýrnalısterdiń quqyǵy buzylyp jatsa, osy sot tıisti shaǵymdardy qaraıdy. Konstıtýtsııalyq Sottyń sheshimin memlekettik organdar oryndaýǵa mindetti. Konstıtýtsııalyq Sottan joǵary eshqandaı organ bolmaıdy», - dedi Senat tóraǵasy.

Budan buryn habarlanǵandaı, búgin Prezıdent Qasym-Jomart Toqaev Konstıtýtsııalyq Sottyń tóraǵasy qyzmetine Elvıra Ábilhasymqyzy Azımovany usyndy.

Senat depýtattary ashyq daýys berý arqyly E. Azımovanyń kandıdatýrasyn biraýyzdan qoldady.

Sonymen qatar, búgin Senattyń jylpy otyrysynda QR Konstıtýtsııalyq Sottyń sýdıalary taǵaıyndaldy.