Konstıtýtsııalyq sottyń bolmaýy azamattar quqyǵynyń qorǵalý deńgeıin esh tómendetpeıdi - A. Jaıylǵanova
Búgin Ortalyq kommýnıkatsııalar qyzmetinde ótken baspasóz máslıhatynda QR Konstıtýtsııalyq Keńes múshesi Anar Jaıylǵanova osylaı málimdedi.
«Elimizde Konstıtýtsııalyq sot joq bolmaǵandyqtan Qazaqstan azamattarynyń konstıtýtsııalyq quqyqtary buzylýy múmkin nemese jetkilikti deńgeıde qorǵalmaıdy degen pikir túbirimen durys emes. Bizdiń azamattarymyzdyń quqyqtary qalaı qorǵalady? Azamattyq, ákimshilik daýlar týyndaǵan sátte, qylmystyq ister boıynsha adamdar sotqa júginedi. Sot júıesiniń, sot bıliginiń basty máselesi Konstıtýtsııanyń 76-babyna sáıkes, azamattardyń quqyqtary men bostandyǵyn qorǵaý bolyp tabylady. Eger qandaı da bir normatıvtik-quqyqtyq akti nemese zań azamattyń quqyǵyn buzyp, ony kemsitetin bolsa, sot isti qaraýdy toqtatyp, Konstıtýtsııalyq Keńeske álgi aktiniń Ata Zańǵa sáıkestigine túsinik berý týraly júginedi. Al mundaı norma tıimdi qyzmet etýde», - deıdi A. Jaıylǵanova.
Onyń sózine qaraǵanda, Konstıtýtsııalyq Keńes qyzmet etip jatqan 1996 jyldyń aqpanynan kúni búginge deıin shamamen 70-ke tarta sottardyń júginý tájirıbesi oryn alǵan. Ol boıynsha Konstıtýtsııalyq Keńes máseleni qarap, zańnyń Negizgi qujatqa sáıkestigine qatysty túsinikter berip keledi. Osylaısha, elimizde azamattar quqyǵyn qorǵaý fýnktsııasyn negizinen sottar atqarady, al zańdardyń Konstıtýtsııaǵa sáıkestigin Konstıtýtsııalyq Keńes qaraıdy.
«Máselen, AQSh-ta da Konstıtýtsııalyq sot joq. Frantsııada da bizdiki sekildi Konstıtýtsııalyq Keńes qyzmet etedi. Eń bastysy, árbir el óz azamattarynyń konstıtýtsııalyq quqyqtary men bostandyqtaryn qorǵaýdyń quraldary men tetigin ózderi tańdap, óz joldaryn ózderi qalyptastyrady», - dedi A. Jaıylǵanova.