Konstıtýtsııalyq sotqa túsken shaǵymdardyń 41 paıyzy sot úkimimen kelispeýden týyndaǵan

ASTANA. QazAqparat – Konstıtýtsııalyq sot tóraǵasy Elvıra Ázimova Parlamenttiń birlesken otyrysynda azamattardan kelip túsetin ótinishterdiń sıpatyna toqtaldy, dep habarlaıdy QazAqparat tilshisi.

«Konstıtýtsııalyq sottyń bes aıdaǵy jumysy azamattardyń óz ótinishinde zańnyń jekelegen erejeleriniń konstıtýtsııaǵa sáıkestigi problemasyn ádil kóteretinin kórsetti. Bes aı ishinde 3000-nan astam azamat óz quqyǵyn konstıtýtsııalyq qorǵaýǵa júgindi. Bul tsıfr - azamattardyń jańa organǵa degen jaı ǵana qyzyǵýshylyǵynyń dáleli emes, ol ótinish berýshilerdiń árqaısysynyń óz quqyǵyn qorǵaý nıetin rastaıdy», - dedi ol.

Elvıra Ázimovanyń aıtýynsha, Qazaqstan zańnamasynda Konstıtýtsııalyq sotqa júgingenge deıin quqyqtyq qorǵaýdyń barlyq basqa quraldaryn qoldaný týraly talap joq.

«Kelip túsken ótinishterdiń jartysyna jýyǵy, shamamen 41%-y sot sheshimderimen kelispeýden týyndaǵan. Bul rette Konstıtýtsııalyq sottyń sot sheshimderine baǵa berýge quqyǵy joq ekenine nazar aýdarý kerek. Azamattardan kelip túsken ótinishtiń bir bóligi sot aktileriniń oryndalmaýyna, turǵyn úı jáne eńbek qatynastaryna, áleýmettik qorǵaýǵa, jazalardyń oryndalýyna, aqparatqa qol jetkizýge, jeke tulǵalardyń bankrottyǵyna jáne taǵy basqalarǵa qatysty. Ótinishtiń tórtten birinde ǵana, ıaǵnı, 26%-ynda azamattar zańdar men basqa da normatıvtik quqyqtyq aktilerdiń konstıtýtsııaǵa saı-saı emestigin tekserýdi suraıdy», - dedi Konstıtýtsııalyq sot basshysy.