Konstıtýtsııalyq sotqa kóbinde qaı óńirdiń azamattary shaǵymdanady

ASTANA. QazAqparat - Búgingi kúnge deıin Konstıtýtsııalyq sotqa 2021 ótinish kelip tústi, dep habarlaıdy QazAqparat.

Vedomstvo málimetinshe, qazir 319 ótinish qaralyp jatyr.

Konstıtýtsııalyq is júrgizýge 12 ótinish qabyldandy, taǵy 32 ótinishti sýdıalar aldyn ala zerdeleý ústinde.

Ótinish berýshiler negizinen sot sheshimimen kelispeý – 44%, normatıvtik quqyqtyq akti nemese onyń jekelegen erejelerin konstıtýtsııalyq emes dep taný – 23%, aqparatqa qol jetkizý – 3,6%, eńbek jáne zeınetaqymen qamsyzdandyrý – 2,3%, qylmystyq-atqarý júıesi - 1,5% jáne ózge de máseleler boıynsha júgingen.

Osy aralyqta azamattardyń ótinishi boıynsha tórt normatıvtik qaýly shyqty.

Atap aıtqanda, Konstıtýtsııalyq sot Salyq kodeksiniń, Qylmystyq-atqarý kodeksiniń, memlekettik qyzmet salasyndaǵy zańnamanyń jekelegen normalaryn Konstıtýtsııaǵa sáıkes emes dep tanydy.

Sondaı-aq, zeınetaqymen qamsyzdandyrý týraly zańnyń jekelegen normalaryn Konstıtýtsııalyq sot Konstıtýtsııaǵa saı dep tanydy.

Ótinishterdiń basym bóligi Astana jáne Almaty qalalarynan, Qostanaı, Qaraǵandy jáne Aqmola oblystarynan kelip tústi.