Konstıtýtsııalyq Sotqa azamattardan 500-den asa ótinish tústi
Azamattyń Konstıtýtsııalyq Sotqa ótinishpen júginý quqyǵy Qazaqstan Respýblıkasy Konstıtýtsııasynyń 72-babynda bekitilgen, dep habarlaıdy QazAqparat Qazaqstan Respýblıkasy Konstıtýtsııalyq Sotynyń baspasóz qyzmetine silteme jasap.
Búgingi tańda Konstıtýtsııalyq Sotqa azamattardan 500-den asa ótinish kelip tústi. Olardyń basym bóligi eki jyldan astam ýaqyt buryn kúshine engen qylmystyq sot úkimderiniń kúshin joıýǵa, tekserýge jáne qaıta qaraýǵa qatysty. Al «Qazaqstan Respýblıkasynyń Konstıtýtsııalyq Soty týraly» Konstıtýtsııalyq zańnyń 45-babynyń 2-tarmaǵyna sáıkes azamattyń ótinishi, eger ol sot aktisi qabyldanǵannan keıin bir jyldan keshiktirilmeıtin merzimde berilse qaraýǵa jatady.
Sondaı-aq, azamattardyń ótinishteriniń 60% - dan astamynda sottar konstıtýtsııalyq normalarǵa qaıshy keletin daýly aktilerdi qoldanǵan ne azamattyń qatysýymen azamattyq nemese ákimshilik isterdegi quqyqtary men bostandyqtaryna tikeleı qatysty bolǵan naqty jaǵdaılar kórsetilmegen.
Sondaı-aq, birqatar ótinishter atalǵan Konstıtýtsııalyq zańnyń 41-baby 4-tarmaǵynyń talaptaryn saqtamaı, zańdy tulǵalardyń atynan kelgen.
Osy normaǵa sáıkes azamattardyń zańdy ókilderi retinde zań konsýltanttary palatasynyń músheleri, advokattar, sondaı-aq zańmen, jarǵymen nemese erejemen osy uıym músheleriniń nemese basqa adamdardyń quqyqtary men múddelerin qorǵaý quqyǵy berilgen uıymdardyń ýákiletti tulǵalary ǵana ótinish bere alady.
Ókildik laýazymy boıynsha nemese zań boıynsha júzege asyrylatyn jaǵdaılardy qospaǵanda, tıisti ókilettikter, sondaı-aq eger ótinishti onyń atynan ýákiletti adamdar bergen bolsa, mundaı ókilettilik týraly qujat azamattyń jazbasha kelisimimen ótinishke qosa beriletin qujattarmen rastalýy tıis.
Konstıtýtsııalyq Sot apparatynyń habarlaýynsha, azamattardyń ótinishteriniń 90% - dan astamynda Konstıtýtsııalyq zańnyń 41, 44, 45-baptarynyń talaptaryn saqtalmaı joldanǵan.
Osyǵan baılanysty, alǵashqy qaraý nátıjeleri boıynsha azamattar men uıymdar atynan ótinish berýshilerdiń atyna zańnamalyq talaptardy túsindire otyryp jáne anyqtalǵan buzýshylyqtar joıylǵan jaǵdaıda qaıta júginý múmkindigi saqtalatynyn kórsete otyryp, egjeı-tegjeıli jaýaptar joldanyp jatqanyn atap ótemiz.
Elvıra Ázimova Qazaqstan Respýblıkasyndaǵy konstıtýtsııalyq zańdylyqtyń jaı-kúıi jónindegi jyl saıynǵy joldaýdy ázirleý kezinde zańnamany qoldana otyryp, azamattardyń kótergen problemalaryna, onyń ishinde keri qaıtarylǵan ótinishterde kóterilgen problemalarǵa da taldaý jasalatynyn atap ótti.
«Konstıtýtsııalyq Sotqa ótinishter Elektrondyq qujat aınalymynyń biryńǵaı júıesi, elektrondyq úkimettiń veb-portaly jáne e-Otinish arqyly qabyldanady. Qaǵaz jetkizgishte Astana qalasy, Máńgilik El kóshesi, 13 mekenjaıy boıynsha hat-habarlardy qabyldaý pýnktinde qabyldanady. Tel.8(7172) 576398, 576340»,-delingen habarlamada.
