Konstıtýtsııalyq Sot sýdıalarynyń ókilettik merzimi 8 jylǵa deıin ulǵaıtylmaq

NUR-SULTAN. QazAqparat – Elimizde Konstıtýtsııalyq Sot sýdıalarynyń ókilettik merzimin 8 jylǵa deıin ulǵaıtý kózdelip otyr. Bul týraly QR Parlamenti palatalarynyń birlesken otyrysynda Ádilet mınıstri Qanat Mýsın aıtty, dep habarlaıdy QazAqparat tilshisi.

«Álemdik praktıkaǵa sáıkes, Konstıtýtsııalyq Sot sýdıalarynyń ókilettik merzimi olardy taǵaıyndaıtyn adamdardyń ókilettik merziminen asyp ketýi kerek. Mysaly, Germanııa, Italııa, Ispanııa, Portýgalııa jáne basqa da birqatar elderdiń konstıtýtsııalyq sottary osylaı qalyptasady. Bul Konstıtýtsııalyq Sot sýdıalarynyń ártúrli saıası kúshterdiń áserinen táýelsizdiginiń negizgi kepili», - dedi «Qazaqstan Respýblıkasynyń Konstıtýtsııasyna ózgerister men tolyqtyrý engizý týraly» zań jobasyn tanystyrǵan mınıstr.

Qanat Mýsınniń atap ótýinshe, osyǵan baılanysty zań jobasynda Konstıtýtsııalyq Sottyń sýdıalary qaıta taǵaıyndalýyna shekteý qoıa otyryp, Konstıtýtsııalyq Sot sýdıalarynyń ókilettik merzimderin 8 jylǵa deıin ulǵaıtý kózdelgen.

Buǵan deıin Q.Mýsın astana ataýyn qaıtarýǵa qatysty aıta kele: «Elorda ataýyn ózgertý máselesin azamattar uzaq ýaqyt boıy keńinen talqylaýda. Ol kezdesýler barysynda jáne referendým kezinde azamattardyń úndeýlerinde kóterildi. Sondyqtan qoǵamdyq pikirdi eskere otyryp, depýtattardyń bul usynysy zań jobasyna engizildi», - degen bolatyn.

Sondaı-aq Ádilet mınıstri Prezıdenttiń mandatyn qaıta saılaný múmkindiginsiz bir merzimge shekteý týraly norma Konstıtýtsııanyń ajyramas bóligine aınalatynyn atap ótti.