Konstıtýtsııalyq sot Ońtústik Koreıa prezıdentiniń ımpıchmentin maquldady
ASTANA. QazAqparat - Ońtústik Koreıanyń Konstıtýtsııalyq soty prezıdent Pak Kyn Hege jarııalanǵan ımpıchmentti maquldady.
Bul týraly daýys berý qorytyndysy jónindegi Konstıtýtsııalyq sot úkiminde aıtylǵan, dep habarlaıdy TASS agenttigi.
Osylaısha, 10 naýryz onyń memleket basshysy retindegi sońǵy kúni boldy. Alaıda, buǵan deıin Ońtústik Koreıa prezıdentteri arasynda mundaı oqıǵa bolmaǵandyqtan, onyń memlekettik rezıdentsııany qashan bosatýy tıistigi áli belgisiz.
Zańǵa sáıkes, merzimnen tys jańa prezıdenttik saılaý 60 kún ishinde ótýi tıis, kúntizbelik esep boıynsha, saılaý shamamen 9 mamyrda bolady.
Pak Kyn He eldiń burynǵy prezıdentterine beriletin artyqshylyqtardan: jalaqynyń 70% kólemindegi ómirlik zeınetaqydan (shamamen 12 mıllıon von nemese $10,4 myń), úsh kómekshiden, jeke júrgizýshi men memlekettik klınıkalardaǵy tegin medıtsınalyq qyzmet kórsetýden aıyrylady. Sonymen birge, oǵan 10 jylǵa emes, tek 5 jylǵa kúzet beriledi.
Sondaı-aq, eks-prezıdent qylmystyq tergeýge tartylmaý ımmýnıtetinen aıyrylady. Demek, ońtústikkoreıalyq prokýratýra Pak Kyn Heden jaýap alyp, ásirese, onyń jaqyn qurbysy Chhve Sýn Sıl men Samsung kompanııalar tobynyń basshysy Lı Chje Enniń daýly jemqorlyq isterine qatysty biraz máseleniń betin ashady degen sóz. Prokýratýra prezıdenttiń bul qylmystyq áreketke qatysy bar dep esepteıdi. Buǵan deıin Pak Kyn He tergeýmen yntymaqtasýdan bas tartyp, ony «saıası tapsyrys» dep ataǵan bolatyn.
