Konstıtýtsııalyq Sot el aýmaǵynda Ata Zańnyń ústemdigin qamtamasyz etetin organ bolady
Konstıtýtsııalyq zań jobasynyń maqsaty - Konstıtýtsııalyq Keńesti Konstıtýtsııalyq Sot retinde qaıta qurý bóliginde Ata Zańǵa engizilgen ózgeristerdi iske asyrý, memlekettiń quqyq qorǵaý ınstıtýttaryn kúsheıtý, Negizgi zań erejeleriniń qatań saqtalýyn qamtamasyz etý. Jalpy, Konstıtýtsııalyq zań jobasy 3 bólimnen, 10 taraýdan jáne 68 baptan turady.
«Jalpy, jobany eki bólikke bólýge bolady: birinshi – Konstıtýtsııalyq Sottyń jáne onyń sýdıalarynyń mártebesi, olardyń kepildikteri men qamtamasyz etilýi, al ekinshisi – konstıtýtsııalyq is júrgizý tártibi. Birinshi bólim boıynsha toqtalsaq, Konstıtýtsııalyq Sot bıliktiń sot tarmaǵyna jatpaıtynyn atap ótkim keledi. Óıtkeni bul másele Konstıtýtsııada túpkilikti sheshildi. Konstıtýtsııalyq Sot elimizdiń búkil aýmaǵynda Konstıtýtsııanyń ústemdigin qamtamasyz etetin organ bolady», - dedi Ádilet mınıstri Qanat Mýsın.
Onyń aıtýynsha, Konstıtýtsııalyq Sottyń sýdıalary mártebesi Konstıtýtsııada aıqyndalatyn jaýapty memlekettik laýazymdy atqaratyn adamdar bolady.
«Zań jobasynda Konstıtýtsııalyq Sot sýdıalaryn taǵaıyndaý jáne olardyń ókilettikterin toqtatý tártibine baılanysty máseleler egjeı-tegjeıli reglamenttelgen. Olardyń táýelsizdigi men kepildikteri de bekitilgen. Konstıtýtsııalyq Sot sýdıalarynyń joǵary mártebesin eskere otyryp, olardy materıaldyq jáne áleýmettik qamtamasyz etý jónindegi normalar engizilgen. Atap aıtqanda, Sot júıesi týraly Konstıtýtsııalyq zańǵa uqsas, Konstıtýtsııalyq Sot sýdıalarynyń otstavkaǵa shyǵý ınstıtýtyn engizý usynylady. Budan ári, Konstıtýtsııalyq Sotty qarjylandyrý tártibin, onyń apparatynyń mártebesin jáne osy organnyń qyzmetin qamtamasyz etýge baılanysty ózge de máselelerdi qamtıtyn Konstıtýtsııalyq Sottyń qyzmetin uıymdastyrý máseleleri qarastyrylǵan», - dedi mınıstr.
Sonymen birge, bul bólimde Konstıtýtsııalyq Sottyń quzyreti jáne ony júzege asyrýdyń uıymdastyrýshylyq nysandary kórsetilgen .
«Konstıtýtsııalyq Sottyń quzyreti Konstıtýtsııanyń 72-babymen tikeleı retteledi. Máselen, Konstıtýtsııalyq sottyń quzyretine saılaýdy ótkizýdiń durystyǵy máselelerin, Parlament qabyldaǵan zańdar men halyqaralyq sharttardyń respýblıka Konstıtýtsııasyna sáıkestigin qaraý, sondaı-aq Konstıtýtsııa normalaryna resmı túsindirme berý jatqyzylǵan», - dedi Q.Mýsın.
Osy oraıda ol Konstıtýtsııalyq Keńestiń barlyq qoldanystaǵy fýnktsııalary Konstıtýtsııalyq Sotqa berilgenin aıtty.
«Biraq, eń mańyzdysy, Konstıtýtsııaǵa engizilgen ózgeristerge sáıkes, Konstıtýtsııalyq Sot azamattardyń ótinishteri boıynsha olardyń quqyqtary men bostandyqtaryna tikeleı tıetin normatıvtik quqyqtyq aktilerdi Konstıtýtsııaǵa sáıkestigin qaraıtyn bolady. Sondaı-aq, Konstıtýtsııalyq Sotqa júginý quqyǵy
Bas Prokýror men Adam quqyqtary jónindegi ýákilge berildi», - dedi mınıstr.
Onyń sózine qaraǵanda, Konstıtýtsııalyq Sottyń ótinishterdi qaraý rásimi jalpy sottardaǵy sot isin júrgizý tártibinen túbegeıli erekshelenedi.
