Konstıtýtsııalyq sot: Adamnyń fotosyn kelisiminsiz paıdalaný Konstıtýtsııaǵa qaıshy emes

ASTANA. QazAqparat – Elimizdiń Konstıtýtsııalyq soty buqaralyq aqparat quraldary betterinde adamnyń beınesin (foto) ruqsatsyz paıdalanýǵa qatysty túsinik berdi, dep habarlaıdy QazAqparat atalǵan vedomstvonyń baspasóz qyzmetine silteme jasap.

Konstıtýtsııalyq sotqa azamat S.V. Naýmtsevten BAQ betterinde adamdardyń beınesin jarııa etýge qatysty ótinish kelip tústi. Ótinish ıesiniń aıtýynsha, BAQ-ta adamnyń beınesin (foto, vıdeo) ruqsatsyz paıdalaný Konstıtýtsııada bekitilgen jeke ómir, jeke jáne otbasylyq qupııaǵa qolsuǵylmaýshylyq quqyǵyna qaıshy keledi.

Konstıtýtsııalyq sot kelesi ustanymdardy alǵa tartty. Qazaqstan Respýblıkasynda azamattyń óz beınesin qorǵaý quqyǵy memlekettiń qadaǵalaýynda. Jeke bas beınesin qorǵaý tek konstıtýtsııalyq normalarmen ǵana emes, azamattyq zańnamamen de retteledi. Azamattyq kodekstiń 145-babyna sáıkes adamnyń beınesin jarııalaý men qaıta paıdalanýdyń aldynda onyń kelisimin alýdy talap etedi. Sondaı-aq «Derbes derekter jáne olardy qorǵaý týraly» Qazaqstan Respýblıkasy zańynyń 7 jáne 15-baptarynyń erejelerin eskerý qajet, ol boıynsha derbes derekterdi paıdalanýda menshik ıesiniń kelisimi bolǵan kezde ǵana jol beriledi.

Sondaı-aq, ótinishte BAQ týraly zańnyń 14-baby 1-1-tarmaǵynyń 3) tarmaqshasyn alyp tastaý nemese atalǵan tarmaqshanyń konstıtýtsııalylyǵyn qamtamasyz etý úshin sottyń qalaýy boıynsha basqa da áreketter qabyldaý máselesi de qoıylǵan.

Qazaqstan Respýblıkasynyń Konstıtýtsııalyq soty joǵarydaǵy jaıtty qaraı kele kelesini qaýly etedi:

1. «Buqaralyq aqparat quraldary týraly» Qazaqstan Respýblıkasy Zańynyń 14-baby 1-1-tarmaǵynyń 3) tarmaqshasy Qazaqstan Respýblıkasy Konstıtýtsııasynyń 4-babynyń 2-tarmaǵyna jáne 18-babynyń 1-tarmaǵyna sáıkes keledi dep tanylsyn.

2. Osy normatıvtik qaýly qabyldanǵan kúninen bastap kúshine enedi, Respýblıkanyń búkil aýmaǵynda jalpyǵa birdeı mindetti, túpkilikti bolyp tabylady jáne shaǵym jasalýǵa jatpaıdy.

3. Osy normatıvtik qaýly zańnamalyq aktilerdi resmı jarııalaý quqyǵyn alǵan merzimdi baspasóz basylymdarynda, quqyqtyq aqparattyń biryńǵaı júıesinde jáne Qazaqstan Respýblıkasy Konstıtýtsııalyq Sotynyń ınternet-resýrsynda qazaq jáne orys tilderinde jarııalansyn.

Normatıvtik qaýlynyń tolyq mátinimen myna silteme arqyly tanysýǵa bolady