Konstıtýtsııalyq sot 5 normatıvtik qaýlyny Atazańǵa saı emes dep tanydy

ASTANA. QazAqparat – Konstıtýtsııalyq sot tóraǵasy Elvıra Ázimova Parlament palatalarynyń birlesken otyrysynda eń kóp ótinish qaı óńirdiń azamattarynan túskenin aıtty, dep habarlaıdy QazAqparat tilshisi.

«20 óńir arasynda eń kóp ótinish Astana, Almaty qalalary men Qostanaı oblysynyń turǵyndarynan kelip tústi. Ókinishke qaraı, 5 aıdaǵy konstıtýtsııalyq is júrgizý qorytyndysy boıynsha, jekelegen normatıvtik quqyqtyq aktilerde eleýli olqylyqtardyń bar ekeni anyqtaldy», - dedi ol.

Sondaı-aq, Elvıra Ázimova 5 aıda memlekettik organdar qabyldaǵan normatıvtik aktilerdiń ishinde Konstıtýtsııaǵa saı kelmeıtin normalar bolǵanyn atap ótti.

«Qabyldanǵan 18 normatıvtik qaýlynyń beseýinde normalar konstıtýtsııaǵa saı emes dep tanyldy. Taǵy beseýi boıynsha Konstıtýtsııalyq sot birkelki quqyq qoldaný maqsatynda tıisti normalarǵa túsindirme berdi. Qazirgi ýaqytta Úkimet pen múddeli organdarǵa qajetti shara qabyldaý usynyldy», - dedi Konstıtýtsııalyq sot tóraǵasy.