Konstıtýtsııalyq reformalar jobasy jalpyxalyqtyq talqylaýǵa shyǵarylady - QR Prezıdenti
"Konstıtýtsııalyq keńestiń, sot júıesi men prokýratýranyń qyzmetin jetildirý máselelerin pysyqtaý qajet. Bizdiń konstıtýtsııalyq qurylymymyzdyń myzǵymastyǵyna berik kepildik kerek. Jumys toby ary qaraı jumysyn jalǵastyratyn bolady. Olarǵa osy máselelerdiń barlyǵyn zerttep, kelesi qoǵamdyq talqylaýlarǵa deıin ózderiniń usynystar toptamasyn daıyndaýy qajet", - dedi Prezıdent.
Memleket basshysynyń sózinshe, atalmysh baǵdarlama negizgi úsh mindetti sheshýi tıis.
"Birinshiden, saıası júıeniń turaqtylyǵyn kóp jyldarǵa qamtamasyz etetin qordy qurý.
Ekinshiden, Úkimet pen Parlament róliniń artýy qazirgi zamanǵy qaýip-qaterlerge jaýap beretin tıimdi tetik qurady.
Iá, bul basqarýdyń kúrdeli júıesi, biraq qoǵam da qazir kúrdelene tústi.
Men prezıdent quzyryndaǵy quzyretti berýge sanaly túrde baryp otyrmyn.
Jáne ony bir maqsatta istep jatyrmyn - eldi basqarýdyń budan da tıimdi, turaqty, qazirgi zamanǵa saı keletin júıesin qurý.
Úshinshiden, memlekettik qurylymnyń ámbebap modeli joq. Barlyǵy izdenis ústinde. Biz eshqashan memlekettik qurylymdy ózgelerden kóshirgen emespiz, ózimizdiń biregeı sheshimderimizdi taptyq, keıbir máselelerde ǵana xalyqaralyq tájirıbelerdi qoldandyq", - dedi N. Nazarbaev.
"Usynylyp otyrǵan reforma eń aldymen ózimizdiń tájirıbege jáne Qazaqstan qajettilikterine súıenip jasalady. Reforma baǵdarlamasy - bizdiń qaı baǵytta damıtyndyǵymyzǵa jaýap deýge bolady.Jaýap naqty - demokratııalyq damý baǵytynda. Qolǵa alynatyn sharalardyń mańyzdylyǵyn eskere otyryp, jaqynda jarııalanatyn konstıtýtsııalyq reformalar jobasyn jalpyxalyqtyq talqylaýǵa shyǵarýdy sheshtim. Tıisti Jarlyq shyqty. Osynyń barlyǵy el damýynyń bolashaǵyna jáne Bes ınstıtýtsıonaldy reformalarǵa sáıkes keledi", - dep túıdi oıyn Prezıdent.
