Konstıtýtsııalyq reforma elimizdiń memlekettik qurlymynyń tuǵyryn nyǵaıtady - Toqaev
ASTANA. QazAqparat – Prezıdenttiń ókilettigin 7 jyldyq bir merzimmen shekteý týraly norma demokratııa jolyndaǵy batyl qadam. Bul týraly búgin zańdarǵa jarııa túrde qol qoıý rásiminde Memleket basshysy Qasym-Jomart Toqaev aıtty, dep habarlaıdy QazAqparat tilshisi.
«Prezıdenttiń ókilettigin 7 jyldyq bir merzimmen shekteý týraly norma Konstıtýtsııada bekitildi. Bul mańyzdy saıası ınnovatsııa - demokratııa jolyndaǵy batyl qadam. Búgin qol qoıylatyn zańdarda kórinis tapqan osy ózgeris joǵarǵy bılikti jeke dara ıemdený áreketterine birjola tosqaýyl qoıady. Sondaı-aq eń joǵary laýazym ıesin órkenıetti jolmen jáne turaqty túrde aýystyrýǵa arnalǵan jańa saıası dástúrdi ornyqtyrady. Konstıtýtsııalyq reforma aıasyndaǵy ózgerister bizdiń «Kúshti Prezıdent – yqpaldy Parlament – esep beretin Úkimet» qaǵıdatymyzdyń mazmunyn baıyta túsedi. Munyń bári «halyq únine qulaq asatyn memleket» tujyrymdamasyn tolyq júzege asyrýǵa baǵyttalǵan», - dedi Qasym-Jomart Toqaev.
Prezıdent bul qadamdar azamattardyń quqyqtary men bostyqtaryn tıimdi qorǵaýǵa arnalǵanyn atap ótti.
«Konstıtýtsııalyq reforma elimizdiń memlekettik qurlymynyń tuǵyryn nyǵaıtady, azamattyq qoǵamnyń damýyna jol ashady. Ózara túsinistikti, jalpyulttyq dıalogty ornyqtyrady. Túptep kelgende, bul qadamdar halyqtyń ál-aýqatyn arttyrýǵa jáne elimizdiń bolashaǵyn baıandy etýge yqpal etedi. Osy oraıda asa mańyzdy zańdardy shuǵyl jáne sapaly qabyldaǵan depýtattarǵa zor rızashylyǵymdy bildiremin. Sonymen birge, jemisti jumys atqarǵan Ulttyq qoǵamdyq senim keńesiniń múshelerine, elimizdiń zańgerler qaýymdastyǵynyń ókilderine alǵys aıtamyn. Kópshiligińiz elimizdegi aýqymdy dıalog alańy - Ulttyq quryltaıda tabysty eńbek etip júrsizder. Sizder konstıtýtsııalyq reformany júzege asyrýǵa zor úles qostyńyzdar», - dedi Memleket basshysy.
Qasym-Jomart Toqaev zańnamalyq aktilerdi ázirleýge jan-jaqty atsalysqan azamattarǵa rızashylyǵyn bildirdi.
«Bul qujattardyń Qazaqstan úshin erekshe mańyzy bar. Zańdar elimizdiń ornyqty damýyna qajetti jańa quqyqtyq negiz qalyptastyrady. Qoǵamdaǵy turaqtylyqty jáne el birligin nyǵaıta túsedi. Halqymyzdyń ómirine tikeleı áser etedi. Sondyqtan, men osy zańdarǵa jarııa túrde qol qoıý qajet dep sheshtim», - dedi Prezıdent.
Budan buryn habarlanǵandaı, Memleket basshysy bıyl maýsym aıynda ótken Konstıtýtsııaǵa ózgerister men tolyqtyrýlar engizý jónindegi respýblıkalyq referendýmnan keıin qabyldanǵan birqatar mańyzdy zańǵa jarııa túrde qol qoıdy.
Qasym-Jomart Toqaev bıyl qyrkúıektegi Joldaýynda bıylǵy kúzde kezekten tys Prezıdent saılaýyn ótkizýdi usyndy.
«Men kóp oılanyp, Prezıdent ókilettigi merzimderiniń sanyn jáne uzaqtyǵyn qaıta qaraý qajet degen baılamǵa keldim. Prezıdent mandatyn uzaqtyǵy 7 jyldyq bir merzimmen shekteýdi usynamyn. Biraq qaıta saılanýǵa tyıym salynady», - dedi Prezıdent.
