Konstıtýtsııalyq ózgerister 2-3 jylda nátıje beredi – Erkin Ábil

NUR-SULTAN. QazAqparat - Konstıtýtsııalyq ózgerister negizinde qabyldanatyn zańdar aldaǵy 2-3 jylda alǵashqy nátıjesin beredi. Mundaı pikirdi Memleket tarıhy ınstıtýtynyń dırektory, tarıh ǵylymdarynyń doktory Erkin Ábil bildirdi, dep habarlaıdy QazAqparat tilshisi.

«Biz qazir bolashaq ózgeristerdiń negizin salyp jatyrmyz. Sondyqtan kóp sozbaı zańdarǵa ózgeris engizý kerek. Bul jumystar júrgizilgen kezde belsendi talqylaý bolýy mańyzdy. Zań shyǵarý protsessin tek jaýapty organdardyń qolyna tapsyryp qoımaı, halyqtyń talqylaýyna salý qajet. Oǵan sarapshylar, qoǵam belsendileri tipti oppozıtsııa músheleriniń de qatysqany jón. Óıtkeni tıisti organdar kórmeı qalatyn qoǵamdaǵy keıbir máselelerdi oppozıtsııa nazarda ustaıdy. Atalǵan jumystar júıeli júrgizilse, saıası ómirdegi ózgerister aldaǵy 2-3 jylda óziniń alǵashqy nátıjesin bere bastaıdy», - dedi Erkin Amanjoluly.

Tarıhshynyń aıtýynsha, birinshi kezekte partııalyq júıede ózgerister bolady. Al ekonomıkalyq jáne áleýmettik saladaǵy irgeli bastamalar uzaq merzimge josparlanǵanyn atap ótti.