Konstıtýtsııalyq Keńes: Zańdarǵa orynsyz jıi ózgeris engizý zań shyǵarmashylyǵyndaǵy kemshilik bolyp tabylady
ASTANA. 14 maýsym. QazAqparat - Búgin QR Parlamenti Palatalarynyń birlesken otyrysynda QR Konstıtýtsııalyq Keńesiniń Tóraǵasy Igor Rogov osylaı málim etti.
Eske salaıyq, Parlamenttiń birlesken otyrysynda Konstıtýtsııalyq Keńestiń «Qazaqstan Respýblıkasyndaǵy konstıtýtsııalyq zańdylyqtyń jaı-kúıi týraly» joldaýy jarııalanǵan bolatyn.
I. Rogovtyń aıtýynsha, elimizdegi konstıtýtsııalyq zańdylyqtyń jaı-kúıin aıqyndaý jáne baǵamdaý qoldanystaǵy quqyq damýynyń belgili bir qorytyndysyn shyǵarýdy ǵana emes, zańnamalyq retteýdiń problemalaryn anyqtaýdy qajet etedi. Konstıtýtsııalyq Keńes Tóraǵasy zań shyǵarmashylyǵyndaǵy jumystarǵa taldaý jasaı kele, qazirgi tańda qoldanystaǵy birqatar zańnamaǵa ózgerister engizilý qajettigin atap ótti. Sonymen qatar, I. Rogov zańnama normalaryndaǵy keıbir uǵymdardyń ashyp kórsetilmegenine de nazar aýdardy. «Zańdarda paıdalanylatyn «alyp qoıý» jáne «májbúrlep aıyrý» termınderiniń uǵymy men aıyrmashylyǵy ashyp kórsetilmedi. Konstıtýtsııalyq Keńes qoldanystaǵy zańdar men normatıvtik aktilerge orynsyz jıiletip ózgerister men tolyqtyrýlar engizilip otyrǵanyn, al munyń zań shyǵarmashylyǵyndaǵy kemshilikterdiń biri bolyp tabylatyndyǵyn atap ótedi», dedi I. Rogov.
