Konstıtýtsııalyq keńes tóraǵasy Premer-Mınıstrdiń usynysy boıynsha daıyndaǵan qaýlysyn jarııa etti
ASTANA. Qarashanyń 5-i. QazAqparat /Aıdar Ospanalıev/ - Búgin Konstıtýtsııalyq keńes tóraǵasy Igor Rogov Premer-Mınıstr Kárim Másimovtyń Konstıtýtsııanyń 4-shi babyn resmı túrde túsindirip berýge qatysty usynysy boıynsha daıyndaǵan normatıvti qaýlysyn jarııa etti,
dep habarlaıdy QazAqparat.
Esterińizge sala keteıik, Konstıtýtsııanyń 4-shi baby elimiz ratıfıkatsııalaǵan halyqaralyq kelisimderdiń ózge zańdardan basymdyqtaryn anyqtaıdy jáne halyqaralyq uıymdardyń sheshimderiniń qoldanylý jaıyn qarastyrady.
Premer-Mınıstrdiń atalmysh usynysty engizý sebebi qazir Úkimette Kedendik odaq komıssııasynyń sheshimderin uıymǵa múshe memleketter arasynda júzege asyrý máselelerinde talqylanýda.
Osyǵan qaraı Konstıtýtsııalyq keńes atalmysh máselelerdi eskere kele halyqaralyq uıymdar men olardyń organdarynyń sheshimderiniń halyqaralyq kelisimder boıynsha, sonymen qatar Kedendik odaq komıssııasy men jalpyǵa birdeı ereje boıynsha ózge zańdardan basymdyǵy bar jáne ol tikeleı qoldanyla beredi degen baılam jasady. Al osyndaı sheshim men elimizdiń zańdarynyń arasynda úılespeýshilik paıda bolǵan jaǵdaıda halyqaralyq uıymnyń sheshimderi basym kúshke ıe bolady jáne ol qalyptasqan másele sheshilgenshe birinshi kezekte qoldanylady.
Sonymen qatar Konstıtýtsııalyq keńes tóraǵasy halyqaralyq uıymdar men olardyń organdarynyń sheshimderi adam quqyqtary men bostandyqtaryna nuqsan keltiretin jáne respýblıkanyń terrıtorııalyq tutastyǵyn buzyp, memlekettigimizge qaýip tóndirgen jaǵdaıda qoldanylmaıtyndyǵyn atap kórsetti.
Konstıtýtsııa talaptary boıynsha, Konstıtýtsııalyq keńestiń qaýlysy qabyldanǵan kúnnen bastap kúshine enedi jáne ol qaıta qaraýǵa jatpaıdy. Sondaı-aq qujat respýblıkanyń barlyq aımaǵynda birdeı zań kúshine ıe.
