Konstıtýtsııalyq Keńes ótken jyldar ishinde quqyqtyq júıede mańyzdy ról atqarǵan 200-ge tarta qaýly shyǵardy - A. Jaıylǵanova

ASTANA. QazAqparat - Qazaqstannyń Konstıtýtsııalyq Keńesi 1996 jyldyń aqpanynan bastap qyzmet etip keledi. Osy jyldar ishinde Keńes 200-ge tarta qaýly shyǵarsa, olardyń árqaısysy Qazaqstannyń quqyqtyq júıesinde mańyzdy ról atqardy. Búgin Ortalyq kommýnıkatsııalar qyzmetinde ótken baspasóz máslıhatynda QR Konstıtýtsııalyq Keńes múshesi Anar Jaıylǵanova osylaı málimdedi.

«Konstıtýtsııalyq Keńes - bul Ata Zań normalaryna jan bitiretin memlekettik organ. Eger Konstıtýtsııalyq Keńestiń, sottardyń qyzmeti bolmasa, onda Konstıtýtsııanyń bir ózi qarapaıym deklaratsııa sekildi kúıde ǵana qalatyn edi. Konstıtýtsııalyq Keńes Konstıtýtsııa normalaryna túsinik beredi, soǵan oraı, quqyq qoldanýshy, sonyń ishinde birinshi kezekte zań shyǵarýshy bılik retinde Parlament, sol normalardy durys túsinip, olardy qoldanystaǵy zańnamaǵa engizip, júzege asyrady», - dedi A. Jaıylǵanova.

Bul rette Konstıtýtsııalyq Keńes múshesi 2012 jyldan beri qoldanylyp kele jatqan azamattardy ustaýdyń konstıtýtsııalyq merzimi týraly qaýlyny mysalǵa keltirdi. Onyń aıtýynsha, Konstıtýtsııada azamattardy 72 saǵattyq ustaý týraly norma bar.

«Al osy 72 saǵattyq ustaý merzimi qaı kezden bastalady? Konstıtýtsııalyq keńestiń qaýlysy shyqqanǵa deıin bizdiń quqyq qorǵaý organdarymyz ben tergeýshiler merzimdi ustaý týraly hattama jasalǵannan sanaýdy bastaý kerek dep eseptep kelgen bolatyn. Al eger qyzmetker ustaý týraly resmı hattamany bir táýlikten soń rásimdese she? Osyǵan baılanysty, Konstıtýtsııalyq Keńes ustaý merzimin naqty ustalǵan sátten bastap esepteý kerek degen qaýly shyǵardy. Mine, dál osyndaı naqty túsinik beretin qaýlylar kóp», - dedi A. Jaıylǵanova.