Konstıtýtsııalyq Keńes Memleket basshysynyń ótinishine bir aı merzim ishinde qorytyndy shyǵaratyn bolady
ASTANA. 17 qańtar. QazAqparat /Qanat Mámetqazyuly/ - QR Konstıtýtsııalyq Keńesi QR Prezıdentiniń Parlament qabyldaǵan «QR Konstıtýtsııasyna ózgeris pen tolyqtyrý engizý týraly» Zańynyń Konstıtýtsııaǵa sáıkestigin qaraý týraly ótinishin qarap, bir aı merzimi ishinde qorytyndy shyǵaratyn bolady.
Búgin Memleket basshysynyń ótinishine baılanysty ótken QR Konstıtýtsııalyq Keńes músheleriniń otyrysynda QR Konstıtýtsııalyq Keńesi tóraǵasynyń mindetin atqarýshy Nıkoloı Belorýkov osylaı málim etti.
Konstıtýtsııalyq Keńes búgin, 17 qańtarda Elbasynyń ótinishin óndiriske alǵannan keıin, memlekettik organdardyń ókilderi arasynan konstıtýtsııalyq is júrgizýge qatysýshylar tobyn aıqyndaý, sondaı-aq qajetti qujattar men ózge de materıaldardy jınaqtaý jáne zerdeleý jónindegi daıyndyq jumysyn bastady. Budan bólek, ótinishti qaraýǵa ártúrli kásip ókilderiniń keńinen qatysýyn jáne olardyń pikirleri taldanýyn qamtamasyz etý maqsatynda otandyq jáne sheteldik eń bilikti sarapshylar qatystyrylatyn bolady. «Elimizdiń Negizgi zańyna sáıkes, Konstıtýtsııalyq keńes Respýblıka prezıdentiniń ótinishin qarap shyǵyp, onyń mán-jaıy boıynsha bir aı merzimi ishinde qorytyndy sheshim shaǵaratyn bolady», - dedi N. Belorýkov.
Esterińizge sala keteıik, qańtardyń 14-inde QR Parlamenti palatalarynyń birlesken otyrysynda «QR Konstıtýtsııasyna ózgeris pen tolyqtyrý engizý týraly» QR Zańy qabyldanyp, Elbasynyń qol qoıýyna usynylǵan bolatyn. Atalǵan zań QR Tuńǵysh Prezıdenti-Elbasy N. Nazarbaevtyń prezıdenttik ókilettigin referendýmda uzartý múmkindigin qarastyrady. Al Memleket basshysy 14 qańtarda zańnyń Konstıtýtsııaǵa sáıkestigin qaraý týraly ótinishti Konstıtýtsııalyq Keńeske joldaǵan edi.
