Konstıtýtsııaǵa tolyqtyrý arqyly saılaý ınstıtýtynyń basty qaǵıdattaryn qoǵamymyzda odan ári damytýǵa jol ashamyz - B. Bekjanov
Búgin - QR Parlamenti palatalarynyń birlesken otyrysynda «Qazaqstan Respýblıkasynyń Konstıtýtsııasyna tolyqtyrý engizý týraly» zań jobasyn talqylaý barysynda sóz sóılegen Májilis depýtaty Berik Bekjanov osylaı málim etti.
«Búgin Táýelsiz Qazaqstannyń ózin demokratııaly, quqyqtyq memleket retinde qalyptastyrý kezeńindegi tarıhı mańyzy bar kún. Sebebi, biz búgin Qazaqstannyń odan ári demokratııalyq baǵyttaǵy damýynyń taǵy bir alǵysharttaryn qalyptastyratyn, elimizdiń saıası-quqyqtyq keńistiginiń jańa bir betin ashpaqpyz. Elbasynyń Parlamentke usynǵan zań jobasy Prezıdenttiń kezekten tys saılaýyn taǵaıyndaý men ótkizýdiń konstıtýtsııalyq alǵysharttaryn belgileıdi. Elimizdiń bıik múddeleri basshylyqqa alyna otyryp, eldiń eldigin, halyqtyń teńdigin saqtaýǵa umtylǵan, demokratııalyq qundylyqtarǵa jol ashqan taǵy bir syndarly qadam jasaldy», - dedi depýtat.
Sonymen birge, B. Bekjanov osyǵan deıingi saıası ahýalǵa sholý jasaı kele, Memleket basshysynyń kezekten tys prezıdenttik saılaý ótkizý týraly usynysyna da toqtalyp ótti.
«Elbasynyń osy sheshimi boıynsha birinshiden, referendýmdy qoldaǵan Qazaqstan jurtynyń ustanymy eskerýsiz qalǵan joq, ekinshiden demokratııanyń negizgi qundylyqtary saqtaldy. Endigi másele - halyq múddesi úshin qabyldanǵan sheshimdi konstıtýtsııalyq turǵydan bekitý. Qoldanystaǵy elimizdiń Ata zańy tek qana prezıdenttiń kezekti saılaýyn ǵana qarastyratyny belgili. Endigi halyq bıliginiń ústemdigi, elimizdiń órkendeýi men qoǵamdyq turaqtylyqty nyǵaıtýǵa, demokratııalyq qundylyqtar men qaǵıdattardy saqtaý maqsatynda Elbasymen qabyldanǵan sheshimdi Konstıtýtsııada baıandaý ýaqyt pen zaman talaby», - dedi B. Bekjanov.
Onyń aıtýynsha, Prezıdenttiń kezekti saılaýynyń negizgi erejeleri men tártibi, merzimi Konstıtýtsııamen jáne konstıtýtsııalyq zańmen bekitilgen. Al usynylǵan zań jobasymen belgilengen erejeler kezekten tys saılaýdyń prezıdentpen taǵaıyndalǵan jaǵdaıyn qarastyrady.
«Osynyń ózi Prezıdenttiń kezekten tys saılaýy ınstıtýtyn ómirde júzege asyrý erejelerin belgilep otyr. Bul birinshiden bizge el múddesi úshin jasalǵaly otyrǵan prezıdenttiń kezekten tys saılaýyn ótkizýdi quqyqtyq qamtamasyz etýge múmkindik berse, ekinshiden azamattarymyzdyń saılaý jáne saılaný quqyǵyn júzege asyrýǵa, úshinshiden saılaý ınstıtýtynyń basty qaǵıdattaryn qoǵamymyzda odan ári damytýǵa jol beredi dep esepteımin. Sondyqtan Elbasynyń usynysyn qoldaý - eldiń erteńin qoldaý, azamattarymyzdyń quqyqtary men bostandyqtaryn saqtaý dep bilem. Sonymen qatar atalǵan zańdy qabyldaý arqyly biz barsha halyqqa, qala berdi búkil álemge konstıtýtsııalyq qundylyqtar men demokratııalyq qaǵıdattarǵa qanshalyqty jaqyn ekenimizdi taǵy bir pash etemiz», - dedi depýtat.
