Konstıtýtsııaǵa arnalǵan halyqaralyq konferentsııa Eýrazııa ulttyq ýnıversıtetinde jalǵasýda

ASTANA. 31 tamyz. QazAqparat - Qazaqstan Respýblıkasy Konstıtýtsııasy kúnine arnalǵan «Konstıtýtsııa - qoǵam men memlekettiń áleýmettik jańǵyrýynyń negizi» taqyrybyndaǵy halyqaralyq ǵylymı-tájirıbelik konferentsııa búgin Astanadaǵy L. Gýmılev atyndaǵy Eýrazııa ulttyq ýnıversıtetinde jalǵasty.

Onda elge tanymal zańger ǵalymdar, Parlament depýtattary, sarapshylar men halyqaralyq uıym ókilderi bas qosyp, Ata zańnyń ár baǵyttaǵy normalarynyń júzege asyrylý barysyn talqylady. 

«Elimiz úshin sońǵy 20 jyldyń belesi aıryqsha kezeń bolsa, sonyń eń úlken asýy bizdiń 1995 jylǵy Ata zańymyzdyń qabyldanýy.  Sodan bergi 17 jyl ishinde Qazaqstan halqy asa bir jańarý kezeńin bastan ótkerdi. Qasterli qundylyqtarymyz, qaǵıdattarymyz, eldik úshingi halyqaralyq baılanystarymyz,  tarıhı dańǵyl jolymyzdyń barshasy Ata zańnan bastaý alyp jatady. Jalpy Konstıtýtsııa memlekettik bıliktiń qaınar kózi retinde  eldigimizdi uıystyra bildi. Jańa Konstıtýtsııany qabyldaý Qazaqstannyń jańa dáýirge qadam basqanyn kórsetti», - dedi jıyndy ashyp sóz sóılegen Eýrazııa ýnıversıtetiniń prorektory Dıhan Qamzabekuly.

Al Astanadaǵy EQYU ortalyǵynyń basshysy Natalıa Zarýdna egemen eldiń Konstıtýtsııa kúniniń mańyzyna toqtala kele, onyń saıası jáne tarıhı máni zor ekendigin atap ótti. «Konstıtýtsııa kúnimen baılanysty osyndaı halyqaralyq jıyndar ótkizýdiń ıgi dástúrge aınalýynyń da ózindik mańyzy bar. Munda konstıtýtsııalyq quqyqqa qatysty erkin pikir almasýlarmen birge, Negizgi zańnyń qoǵamdaǵy róline de aıryqsha nazar aýdarylyp otyr», - dedi EQYU ortalyǵynyń basshysy.

Jıyn barysynda birqatar ǵalymdardyń, saıasatkerler men sarapshylardyń baıandamalary tyńdalyp, talqylandy.