Konstıtýtsııa kúnine arnalǵan áskerı sherýge áskerı qyzmettegi áıelder tuńǵysh ret qatysady

nbsp;ASTANA. Tamyzdyń 17-si. QazAqparat /Jasulan Amanbaıuly/ - Tamyzdyń 30-da Konstıtýtsııa kúnine arnalǵan áskerı sherýge áskerı qyzmettegi áıelder tuńǵysh ret qatysqaly otyr. Bul týraly búgin sherý daıyndyǵyna arnalǵan kóshpeli brıfıngte áskerı sherýdiń qolbasshysy, QR QK Qurlyq áskerleriniń Bas qolbasshysy general-maıor Murat Maıkeev málim etti,

dep habarlaıdy QazAqparat.

«Jeke quram bizdiń QarýlyKúshterimizdiń barlyq garnızondarynan úzdik sarbazdar men ofıtserlerden iriktelip alyndy. Sonymen qatar bul sherýde buryn-sońdy kórsetilmegen áskerı tehnıka shyǵarylatyn bolady. Áskerı sherýge tolyq daıynbyz», deıdi M. Maıkeev.

Sherýge qatysýshylardy ornalastyrý úshin Astana mańyndaǵy 68665 áskerı bólimi aýmaǵynda arnaıy lager qurylǵan. Shatyrly lagerde sharýashylyq bólimi, medpýnkt, sport qalashyǵy jáne mádenı-demalys ortalyǵy uıymdastyrylǵan.

«Áskerı qyzmettegi áıelder sap túzip júrdi óte joǵary deńgeıde meńgergendigin kórsetip, barlyǵymyzdy tańqaldyryp otyr. Qazirgi ýaqytta olardyń turmystyq jáne moraldyq-psıhologııalyq daıarlyqtary sátti júrip jatyr», deıdi ol.

QR QK Qurlyq áskerleri Shtab bastyǵynyń orynbasary, lager bastyǵy polkovnık Erkebolat Ospanovtyń aıtýynsha, sherýge 86 áıel qatysady.

Tamyzdyń 30-da «Qazaq eli» monýmenti aldynda Konstıtýtsııa kúnine arnalǵan áskerı sherýdi Qazaqstan Respýblıkasy Qarýly Kúshteriniń Joǵarǵy Bas Qolbasshysy, Elbasy Nursultan Nazarbaev qabyldaıdy .

Alańda Qorǵanys mınıstrliginiń Qurlyqtaǵy áskerleri, Áýe qorǵanysy kúshteri jáne Áskerı-Teńiz kúshteri, sondaı-aq Іshki ister mınıstrliginiń, Ulttyq qaýipsizdik komıtetiniń, Tótenshe jaǵdaılar mınıstrliginiń jáne Respýblıkalyq Ulannyń jasaqtary sap túzep júredi.

Áskerı sherýge 150-dan astam áskerı tehnıka tartylǵan. Barlyǵy derlik tól áskerimizdiń shtatty birligine qabyldanǵan tehnıkanyń úlgileri. Sherýdi elimizdiń Áýe qorǵanysy kúshteriniń ıeligindegi áskerı avıatsııa jalǵastyrady. Sharaǵa 66 ushý apparattary tartylady.