Konstıtýtsııa kúni Jetisýdaǵy 2 myńǵa jýyq aýyl turǵyny gazǵa qosyldy

TALDYQORǴAN. QazAqparat - Konstıtýtsııa kúninde Jetisý oblysynda aýyldyq jerdegi 2 myńǵa jýyq turǵyn kógildir otynǵa qosylýǵa múmkindik aldy. Osy kúni qýanyshqa kenelgen Eskeldi aýdany Órqýsaq aýyly men Taldyqorǵandaǵy Prıgorodnyı men 3-shi bólimshege Jetisý oblysynyń ákimi Beıbit Isabaev arnaıy bardy, - dep habarlaıdy QazAqparat tilshisi.

Órqýsaq aýylynda turǵyndardy quttyqtaǵan oblys basshysy eldiń turmys sapasyn jaqsartýda aýyz sý, jol, gaz, turǵyn úı qurylysy, jumyspen qamtý, áleýmettik nysandar salý sekildi ıgilikter aldyńǵy orynda turatynyn aıtty.

Memleket basshysynyń atqarýshy organnyń aldyna qoıyp otyrǵan basty mindetteri de osy.

«Ótken aptada gaz Muqyryǵa berilgen, búgin, mine, sizderdiń aýylǵa jetkizilip otyr. Sol sııaqty osy kúni Taldyqorǵan qalasyndaǵy Prıgorodnoe aýyly men №3 bólimshe turǵyndary da osyndaı qýanyshqa kenelip otyr. Bıyl 19 aýylǵa, kelesi jyly 20 aýylǵa gaz qosamyz. Taldyqorǵannan ári gaz qubyry Aqsý, Sarqan, Alakól, Panfılov aýdandaryna tartylady. Sóıtip 2024 jyly gazben qamtý - 41 paıyz, 2025 jyly 53 paıyzǵa jetedi. Qýanyshtaryńyz qutty bolsyn. Gazben birge úılerińizge jyly shýaq kirsin»,- dedi oblys ákimi Beıbit Isabaev.

Oblys basshysynyń aıtýynsha, áleýmettik jaǵynan áljýaz turǵyndardyń gaz qazandyǵynyń baǵasyn 10 aıǵa bólip tóleýge múmkindigi bar.

Al bul aýylǵa gaz júıesin júrgizýge jergilikti bıýdjetten 80,2 mln.teńge jumsalǵan.

Munymen Eskeldi aýdanyn gazdandyrý aıaqtalǵan joq. Qazirgi kezde Qarabulaqtaǵy 3177 abonenttiń 1218-i gazǵa qosylǵan.

Baqtybaı, Aldabergenov, Ekpindi aýyldarynda gaz jetkizý qubyry men gaz taratý jelisiniń qurylysy, M.Baıysov, Kókjazyq, Terekti, Qaratal aýyldarynda da gaz taratý jelileriniń qurylysy júrip jatyr.

7 aýylǵa - Shymyr, Jetisý, Jastar, Jańalyq, Abaı, Ótenaı, Eshkiólmes aýyldaryna gaz jetkizý jumystarynyń jobalyq-smetalyq qujattary ázirlenip jatyr.

Osy kúni gazǵa Taldyqorǵan qalasy mańyndaǵy 2 eldi meken de qol jetkizdi. Olar - 300-deı turǵyny bar Prıgrorodnyı jáne 1150 adam turatyn Úshinshi bólimshe.

«Іrgemizdegi Taldyqorǵanǵa gaz kelgeli biraz bolǵan. Bizge de qubyr tartsa dep armandap edik, búgin armanymyz oryndaldy. Osy iske atsalysqan azamattardyń bárine alǵys aıtamyz. Turmysymyz jeńildeıtin boldy. Biz úshin merekege úlken syı boldy», - dedi Prıgorodnyı aýylynyń turǵyny Nurlan Tálip.

Jalpy qabyldanǵan sharalardyń nátıjesinde Taldyqorǵannyń 54 myńnan astam abonentine gazǵa qosylýǵa múmkindik jasaldy, sonyń 30 myńnan astamy búginde kógildir otynnyń ıgiligin kórip otyr.

«Biz qala mańyndaǵy eldi mekenderge tabıǵı gaz jetkizýge erekshe kóńil bólemiz. Búginniń ózinde 2 myńdaı turǵynǵa gazǵa qosylýǵa múmkindik jasaldy. Ázirge Jetisý oblysynda eldi mekenderdi gazdandyrý deńgeıi 10%, ıaǵnı 250 myńdaı abonenti bar 19 eldi mekenge gaz tartyldy», - dep B. Isabaev.

Atap ótsek, búgingi kúni 30 metrge deıingi qashyqtyqqa gaz qubyryn tartý gaz qazandyǵynyń baǵasyn qospaǵanda orta eseppen 130-150 myń teńgeden aspaıtyn qostyrý qunyn belgileý jumysy júrgizilip jatyr.

Osy kúni oblys basshysy Qarabulaqtaǵy sý jınaǵysh nysannyń rekonstrýktsııa jumystarymen tanysty.

Foto: infosmi.net