Konstıtýtsııa kúni merekesinde Aqtóbede 50 jup neke qıdyrdy
AQTÓBE. QazAqparat - Aqtóbede bir kúnde 50 jup neke qıdyrdy. Neke qıdyrý rásimi qalanyń ortalyǵynda ótti, dep habarlaıdy QazAqparat tilshisi.
Aqtóbelik jas jubaılar búgin saltanatty túrde neke qıdyrdy. Konstıtýtsııa kúnine arnalǵan sharaǵa Aqtóbe oblysynyń ákimi Berdibek Saparbaev qatysty. 
«22 jyl buryn qazaqstandyqtar jalpy referendýmda elimizdiń Konstıtýtsııasyn qabyldady. Ótken jyldardyń ishinde Qazaqstannyń Konstıtýtsııasy óziniń ómirlik kúshin dáleldedi. Konstıtýtsııanyń arqasynda elimizdiń ekonomıkasy damyp, Qazaqstannyń halyqaralyq arenadaǵy róli jyldan jylǵa artyp keledi. Azamattardyń quqyqtary men bostandyqtaryna kepildik beretin Ata Zańymyzdyń arqasynda júzden astam ulttardyń ókilderi Qazaqstanda bir shańyraqtyń astynda turyp jatyr. Osynyń barlyǵy Prezıdentimiz Nursultan Nazarbaevtyń júrgizip otyrǵan saıasatynyń turaqtylyǵyn aıǵaqtaıdy»,- dedi oblys ákimi Berdibek Saparbaev. 
Aqtóbe qalasynyń ortalyq dańǵylyna 12 myńnan asa adam jınalyp, merekelik sherýge qatysty. Mektep oqýshylary men stýdentter, muǵalimder men kásiporyn jumysshylary sap túzep, merekelik baǵdarlamany tamashalady. 
«Búgin Konstıtýtsııa kúni, ózimniń týǵan kúnim jáne úılený toıy. Úsh mereke qatar keldi. Ózim 50 jastamyn. Jastarmen birge kelip, alańda neke qıdyrdym. Bizdiń basqosýymyzǵa týystarymnyń tanystary sebep boldy. Óte qýanyshtymyz»,- dedi Serik Qylyshbaev.
Aıta keteıik, otbasy qurǵanyna 65 jyl tolǵan Baqyt pen Olga Іzbasarovtar jas jubaılarǵa óz ósıetin aıtty. Neke qıdyrǵan jastar vals bılep, shar ushyrdy.
